Delhi Water Crisis: मोठी बातमी! पाणी प्रश्नासाठी उपोषणाला बसलेल्या 'आप' नेत्या आतिशी यांची प्रकृती खालावली; मध्यरात्री रुग्णालयात दाखल

दिल्ली, ता. २५ जून २०२४

राजधानी दिल्लीच्या पाणीप्रश्नासाठी केजरीवाल सरकारमधील जलमंत्री आप नेत्या आतिशी यांनी बेमुदत उपोषण सुरू केले आहे. आज या उपोषणाचा चौथा दिवस असून मध्यरात्री आतिशी यांची प्रकृती खालावल्याचे समोर आले आहे. त्यांना तात्काळ रुग्णालयात दाखल करण्यात आले आहे.

राजधानी दिल्लीमध्ये पाणीटंचाईचा प्रश्न दिवसेंदिवस बिकट होत चालला आहे. हरियाणा सरकार दिल्लीच्या वाट्याचे पाणी देत ​​नसल्याचा आरोप केजरीवाल सरकारने केला आहे आणि त्याच विरोधात जलमंत्री आतिशी यांनी २१ जून पासून उपोषण सुरू केले आहे. आज या उपोषणाच्या चौथ्या दिवशी त्यांची प्रकृती खालावल्याने त्यांना रुग्णालयात दाखल करण्यात आले आहे.

मंत्री आतिशी यांची रक्तातील शुगर पातळी 36 वर घसरली आहे. त्यामुळे त्यांना रुग्णालयात दाखल करण्यात आले आहे. रात्रीपासून त्यांची रक्तातील साखरेची पातळी कमी होत होती. आम्ही जेव्हा त्याचे रक्ताचे नमुने घेतले तेव्हा त्याची साखरेची पातळी 46 असल्याचे समोर आले. जेव्हा आम्ही पोर्टेबल मशीनने शुगर पातळी तपासली तेव्हा साखरेची पातळी 36 असल्याचे समोर आले, अशी माहिती दिल्लीचे आरोग्य मंत्री सौरभ भारद्वाज यांनी दिली.

दरम्यान, 28 लाख दिल्लीकरांच्या हक्काचे पाणी देण्यासाठी बेमुदत उपोषणासाठी बसलेल्या जलमंत्री आतिशी यांनी हरियाणा सरकार जोपर्यंत दिल्लीकरांचे पाणी हक्क प्रदान करत नाही आणि हथनीकुंड बॅरेजचे दरवाजे उघडत नाही तोपर्यंत आपले बेमुदत उपोषण सुरूच राहणार असल्याचे सांगितले आहे.