Special Mega Block: विकेंडला मुंबईकरांचे हाल! पश्चिम रेल्वेवर ३६ तासांचा मेगा ब्लॉक; तब्बल १६२ लोकल रद्द

पश्चिम रेल्वेने प्रवास करणाऱ्या प्रवाशांसाठी महत्त्वाची बातमी आहे. पश्चिम रेल्वेवर शनिवारी आणि रविवारी मेगा ब्लॉक असणार आहे. शनिवार रविवारी जर तुम्हाला प्रवास करायचा असेल तर तुम्हाला वेळापत्रक पाहूनच बाहेर पडावे लागणार आहे. पश्चिम रेल्वेवर कांदिवली आणि बोरिवलीदरम्यान सहाव्या मार्गिकेसाठी ३६ तासांचा ट्राफिक आणि पॉवर ब्लॉक घोषित करण्यात आला आहे.

३१ मे म्हणजे आज दुपारी ते १ जूनच्या मध्यरात्रीपर्यंत हा मेगा ब्लॉक असणार आहे. त्यानुसार शनिवारी दुपारनंतर ७३ आणि रविवारी दिवसभरात ८९ लोकल फेऱ्या रद्द राहणार आहेत. एकूण १६२ लोकल फेऱ्या रद्द करण्यात आल्या आहेत. त्यामुळे प्रवाशांचे मात्र हाल होणार आहेत. तसेच दोन दिवस लोकल फेऱ्या उशिराने धावणार आहे.

कांदिवली-बोरीवलीदरम्यान सहाव्या मार्गिकेसाठी पाचव्या आणि यार्ड मार्गावर ब्लॉक घेण्यात आला आहे. कांदिवलचे पश्चिम बाजूचे तिकीट आरक्षण केंद्र पाडण्यात येणार आहे. यासाठी पर्याय म्हणून सात खिडक्यांचे नवे केंद्र खुले केले आहे.

या विशेष ब्लॉकचा परिणाम अनेक एक्सप्रेस लोकलवरदेखील होणार आहे. ३१ मे रोजी धावणारी अहमदाबाद बोरिवली एक्सप्रेस ही वसई रोडपर्यंतच चालवण्यात येईल. १ जून रोजी धावणारी बोरीवली-अहमदाबाद एक्सप्रेस वसईवरुन जाईल. आज आणि उद्या धावणारी बोरिवली नंदुरबार एक्सप्रेस भाईंदर स्टेशनवरुन धावेल. तसेच ३१ मे रोजीची नंदूरबार बोरिवली ही ट्रेन वसई रोडपर्यंतच चालवली जाणार आहे.

उद्या मध्य, हार्बर रेल्वेवर मेगा ब्लॉक

उद्या रविवार १ जून रोजी मध्य आणि हार्बर रेल्वेवर मेगा ब्लॉक घेण्यात येणार आहे. यामध्ये सीएसएमटी ते विद्याविहार आणि सीएसएमटी ते चुनाभट्टी या स्थानकादरम्यान मेगाब्लॉक घोषित केला आहे. या काळात सिग्न आणि रेल्वे रुळाची कामे केले जाणार आहे. त्यामुळे अनेक लोकल रद्द केल्या जाणार आहे. तर अनेक लोक उशिराने धावणार आहेत.