Viral Video : "मी गुजराती..." पुण्यात भाषेवरून राडा! मराठी न बोलणाऱ्या तरुणाला हात जोडून मागायला लावली माफी; पहा व्हिडिओ

मराठी बोलण्यावरून वाद होणारे अनेक व्हिडिओ आपण दररोज सोशल मीडियावर पाहतो. कधी मराठीसाठी मारामारी, तर कधी हिंदीसाठी परप्रांतीयांचा आडमोठेपणा पाहायला मिळतो. आता यात आणखी एका पुण्यातील व्हिडिओची भर पडली आहे. पुण्यात एका तरुणांकडून "मी मराठी बोलणार नाही मी गुजराती आहे" असं बोलण्याचा एक व्हिडिओ सोशल मीडियावर व्हायरल झाला. या व्हिडिओमुळे पुन्हा एकदा भाषावादाने डोकं वर काढलं आहे.

व्हिडिओमध्ये चित्रित झाल्याप्रमाणे, पुण्याच्या रस्त्यावर एक तरुण आपली गाडी पार्क करतो. पार्किंगचा चार्ज देण्यासाठी सुट्टे पैसे नसल्याने पार्किंग चालकाशी त्याने वाद घातला. पार्किंगचा चार्ज घेणारा व्यक्ती मराठीत बोलतो आहे पण व्हिडिओमधील तरुण त्याला हिंदीतच उत्तरं देत राहतो. शिवाय “मला मराठी येत नाही, मी गुजराती आहे," असं तो वारंवार म्हणत असल्याचं पाहायला मिळत आहे. यावर आजूबाजूला जमलेल्या काही स्थानिक तरुणांचा राग अनावर झाला.

संतप्त झालेल्या तरुणांनी “इथे पुण्यात राहायचं तर मराठी शिकायला काय हरकत आहे?” असा सवाल करत त्यांनी या गुजराती तरुणाला घेरलं. वाद इतका वाढला की, शेवटी त्याला हात जोडून “सॉरी, मी चुकीच बोललो” अशी माफी मागायला भाग पाडलं गेलं.

हा संपूर्ण प्रकार कॅमेऱ्यात कैद झाला आणि काही तासांतच तो सोशल मीडियावर प्रचंड व्हायरल झाला. दरम्यान हा व्हिडिओ नेमका पुण्यातील कोणत्या भागातील आहे हे अद्यापही गुलदस्त्यात आहे. सोशल मीडियावर या व्हिडिओच्या खाली कमेंट बॉक्समध्ये नेटकऱ्यांच्या संमिश्र प्रतिक्रिया पाहायला मिळाल्या आहेत. काहींनी त्याच्या वागण्याचं समर्थन केलं आहे. तर काहींनी गुजराती तरुणाचा निषेध केला आहे.