Shocking : 'तू लडका है या लडकी' म्हणत तरुणीचा विनयभंग अन् मारहाण,उल्हासनगर हादरलं!

अजय दुधाणे, उल्हासनगर

उल्हासनगरमधून धक्कादायक बातमी समोर आली आहे. एका तरुणीचा विनयभंगकरून तिला मारहाण करण्यात आली. धक्कादायक म्हणजे याप्रकरणी जाब विचारायला गेलेल्या पीडित तरुणीच्या कुटुंबियांना देखील मारहाण करण्यात आली आहे. या घटनेचा सीसीटीव्ही फुटेज समोर आला आहे. या प्रकरणी पोलीस ठाण्यात गुन्हा दाखल करण्यात आला असून पुढील तपास सुरु आहे.

मिळालेल्या माहितीनुसार, उल्हासनगर शहरातील कॅम नंबर एक परिसरात राहणारी एका तरुणी रस्त्यावरून जात होती. यादरम्यान अंश करोतीया या तरुणाने तिला ' तू लडका है या लडकी' असे म्हणत हिणवले, तसेच तिची खिल्ली उडवली. एवढ्यावर न थांबता अंश करोतीयाने त्या तरुणीचा विनयभंग करत तिला मारहाण केली.

घडलेला हा सगळा तरुणीने कुटुंबियांना सांगितला. त्यानुसार पीडित तरुणीचे कुटुंबीय अंश करोतीयाला जाब विचारण्यासाठी त्याच्या घरी गेले. दरम्यान जाब विचारायला गेलेल्या पीडित तरुणीच्या कुटुंबियांना जबर मारहाण करण्यात आली. हा सर्व प्रकार जवळच असलेल्या चाळीतील सीसीटीव्ही कॅमेऱ्यात कैद झाला आहे .

मारहाण केल्याप्रकरणी पीडित तरुणीच्या कुटुंबीयांनी पोलीस ठाण्यात धाव घेतली. याप्रकरणी अंश करोतीया विरोधात तक्रार नोंदवण्यात आली आहे. पोलिसांनी याप्रकरणात लक्ष घातले आहे. शिवाय पोलिसांनी पुढील तपास सुरू केला आहे. दरम्यान या घटनेने परिसरात खळबळ उडाली असून मुलींच्या सुरक्षिततेवर प्रश्न उपस्थित केला जात आहे.