विधवा महिलांनीही वटपौर्णिमा साजरी करावी : तृप्ती देसाई

मुंबई : भारतीय संस्कृतीत सौभ्याग्याला अनन्यसाधारण महत्व आहे. भारतीय संस्कृतीत (Culture) महिलेला आदराचे स्थान आहे. महाराष्ट्रातील काही महिला आवडीने मंगळागौरी देखील साजरा करतात. वटपौर्णिमा हा सण राज्यात मोठ्या उत्साहाने साजरा करतात. आज सकाळपासून राज्यातील विविध जिल्ह्यात महिला वडाची पूजा करत आहे. मात्र, विधवा महिलांसाठी काही विशेष सण समांरभ नसतो. या पार्श्वभूमीवर विधवा महिलांनीही वटपौर्णिमा साजरी करावी, असे मत सामाजिक कार्यकर्त्या तृप्ती देसाई (Trupti Desai) यांनी व्यक्त केले आहे.

तृप्ती देसाई म्हणाल्या,' वटपौर्णिमा साजरी करणाऱ्या महिलांनी वडाच्या झाडाच्या तोडलेल्या फांद्याची पूजा करू नये. त्यापेक्षा एक वडाचे झाड लावून त्याचे कायम पालन पोषण करण्याचा वटपौर्णिमेदिवशी संकल्प करावा. जशी आपल्याला सत्यवानाची सावित्री समजली तशी जोतिबाची सावित्रीही समजली आहे.म्हणून सत्यवानाच्या सावित्रीचा जयघोष फक्त वटपौर्णिमेच्या दिवशी केला जातो. ज्योतिबाची सावित्री प्रत्येकाच्या हृदयात आहे. आज मुली शिकत आहेत. प्रगती करत आहेत, महिला उच्चपदावर काम करत आहेत'.

ज्या विधवा महिलांची इच्छा वटपौर्णिमेचे व्रत आणि पूजा करण्याची आहे. त्यांनी पुढाकार घेऊन वटपौर्णिमा साजरी करावी. कारण हा सण महिलांचा आहे. फक्त सुवासिनी म्हणून इतरांशी भेदभाव करणाऱ्यांचा नाही,असेही तृप्ती देसाई म्हणाल्या.

सुप्रिया सुळेंचे विधवा महिलांसमवेत वटपौर्णिमेचे पूजन

खासदार सुप्रिया सुळे या अमरावती जिल्हा दाै-यावर आहेत. आज अमरावती येथे सुळे यांनी महिलांसमवेत वटपाेर्णिमा साजरी केली. या सणात विधवा महिलांना देखील त्यांनी सहभागी करुन घेतले. राष्ट्रवादी काँग्रेसच्या नेत्या खासदार सुप्रिया सुळे (supriya sule) यांनी आज अमरावती येथे विधवा महिलांसमवेत वटपौर्णिमेचे पूजन (vat purnima) करून एक नवा पायंडा अमरावतीत रोवला आहे.