Thane Water Supply : ठाण्यात शुक्रवारी पाणी पुरवठा बंद, कोणकोणत्या ठिकाणी येणार नाही पाणी? वाचा सविस्तर

Thane Water Supply : महाराष्ट्र औद्योगिक विकास महामंडळाच्या पाणी पुरवठा योजनेच्या अंतर्गत जलवाहिनीवर तातडीने दुरुस्ती करण्यासाठी ठाण्यामध्ये २४ तास पाणी पुरवठा बंद राहणार आहे. ठाण्याच्या ठराविक भागांमध्ये दुरुस्तीचे काम पूर्ण झाल्यानंतर पुढचे काही तास पाणी पुरवठा कमी दाबाने होईल अशी माहिती समोर आली आहे.

बारवी गुरुत्व वाहिनीवर कटाई नाका ते मुकुंद पर्यंतच्या एमआयडीसीच्या जलवाहिनीवर तातडीच्या देखभाल दुरुस्तीचे काम होणार आहे. यामुळे ठाणे महानगरपालिका क्षेत्रामध्ये कळवा, दिवा आणि मुंब्रा या भागांमध्ये २४ तास पाणी पुरवठा बंद ठेवण्याचा निर्णय पालिकेद्वारे घेण्यात आला आहे. दुरुस्तीचे काम अत्यंत महत्त्वपूर्ण असल्याने पाणी पुरवठा बंद असणार आहे.

ठाणे महापालिकेच्या क्षेत्राच्या कळवा, दिवा आणि मुंब्रा या तीन भागांमध्ये उद्या गुरुवार ६ फेब्रुवारी २०२५ मध्यरात्री १२.०० वाजल्यापासून ते परवा शुक्रवार ७ फेब्रुवारी २०२५ मध्यरात्री १२.०० वाजेपर्यत असा २४ तास पाणी पुरवठा बंद राहणार आहे. या कालावधीमध्ये पाणी काटकसरीने वापरण्याचे आवाहन पालिकेने नागरिकांना केले आहे.

७ फेब्रुवारी मध्यरात्री १२ नंतरचे काही तास पाणी पुरवठा कमी दाबाने होईल अशी माहिती देखील महापालिकेने नागरिकांना दिली आहे. दुरुस्ती पूर्वी पाणी साठवून ठेवण्याचे, पाण्याचा गैरवापर न करण्याचे आवाहन देखील ठाणे महानगरपालिकेने नागरिकांना केले आहे. ठाण्याप्रमाणे तांत्रिक कामांमुळे आज (५ फेब्रुवारी) काही भागांमध्ये पाणी पुरवठा बंद आहे.