बहिणीला त्रास देत असल्याच्या रागातून १९ वर्षीय तरुणाला राग अनावर झाला. त्याने मित्राच्या मदतीने भावजीची हत्या केली. ही धक्कादायक घटना पुणे शहरातील बालेवाडी परिसरातील पाटील वस्तीत घडली. खूनानंतर आरोपी पसार झाले असून, पोलिसांकडून त्यांचा शोध घेतला जात आहे. या घटनेनं परिसरात मोठी खळबळ उडाली आहे. ('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)
राजेंद्र कुमार कांबळे (वय २४, रा. बालेवाडी) असे खून झालेल्याचे नाव आहे. याप्रकरणी चतु:श्रृंगी पोलीस ठाण्यात (Police) बाब्या व राहुल रिकामे यांच्यावर गुन्हा दाखल करण्यात आला आहे. याबाबत एका १८ वर्षीय तरुणाने तक्रार दिली आहे.
मिळालेल्या माहितीनुसार, मृत राजेंद्र हा बिगारी काम करत होता. काही महिन्यांपूर्वीच तो पुण्यात (Pune News) आला होता. बालेवाडी येथील पाटील वस्तीत तो भाड्याच्या खोलीत राहत होता. दरम्यान, मृत राजेंद्र हा पत्नीला मानसिक त्रास द्यायचा इतकंच नाही, तर तिला मारहाण देखील करायचा.
पती सतत मला मारहाण करतो, अशी तक्रार बहिणीने आरोपी भावाकडे केली होती. या गोष्टीचा राग मनात धरून आरोपी भावाने बुधवारी रात्री बहिणीचं घर गाठलं. तिथे मित्राच्या मदतीने त्याने भाऊजीला बेदम मारहाण केली. या मारहाणीत राजेंद्र याचा जागीच मृत्यू झाला.
दरम्यान, हत्येनंतर आरोपींनी घटनास्थळावरून पळ काढला. गुरुवारी पहाटे हा प्रकार उघडकीस येताच पोलिसांनी तातडीने घटनास्थळी धाव घेत राजेंद्रचा मृतदेह ताब्यात घेतला. याप्रकरणी पोलिसांनी आरोपींवर खूनाचा गुन्हा दाखल केला असून त्यांचा शोध सुरु केला आहे.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.