Political News: पुण्यात ठाकरे गटाला मोठा हादरा बसणार? नाराज नेता राजीनामा देण्याच्या तयारीत

पुणे(Pune) : पुण्यात पोटनिवडणुकीवरुन सर्वच पक्षात नाराजी नाट्य पाहायला मिळत आहे. शिवसेनेच्या ठाकरे गटालाही नाराजीचा फटका बसण्याची शक्यता आहे. कारण शिवसेनेच्या ठाकरे गटाचे कसबा मतदारसंघातील नेते विशाल धनवडे नाराज असल्याची चर्चा आहे.

महाविकास आघाडीकडून कसबा पोटनिवडणुकीत ही जागा काँग्रेसच्या वाट्याला आली आहे. महाविकास आघाडीकडून रवींद्र धनगेकर यांना उमेदवारी देण्यात आली आहे. ठाकरे गटाचे विशाल धनवडे कसबा मतदारसंघात उमेदवारीसाठी इच्छुक होते. यामुळे ठाकरे गटाने विशाल धनवडे नाराज झाल्याची चर्चा आहे. (Latest News)

नाराज विशाल धनवडे राजीनामा देण्याचा तयारीत असल्याचंही बोललं जात आहे. विशाल धनवडे यांच्याकडे कसबा क्षेत्ररक्षक पदाची जबाबदारी आहे.मात्र आता धनवडे राजीनामा देत ठाकरे गटाला धक्का देतात की त्यांची नाराजी दूर केली जाईल, हे लवकरच स्पष्ट होईल.

उमेदवारी अर्ज मागे घेण्याचा आज शेवटचा दिवस

कसबा आणि चिंचवडमध्ये आज अर्ज मागे घेण्याचा शेटवचा दिवस आहे. कसब्यात एकूण 29 उमेदवारांनी आपला उमेदवारी अर्ज भरला आहे. तर चिंचवडमध्ये 33जणांनी उमेदवारी अर्ज दाखल केलाय.

राहुल कलाटेंमुळे मविआची अडचण झाली आहे. तर कसब्यात ठाकरे गटाबरोबर युती असूनही संभाजी ब्रिगेडनं उमेदवारी अर्ज भरलाय. आज शेवटच्या दिवशी कोण माघार घेणार हे पाहावं लागेल.