शिवसेनेच्या नेत्यांकडून भाजपच्या केंद्रीय राज्यमंत्र्यांना शुभेच्छा; चर्चांना उधाण

डोंबिवली : भाजपचे केंद्रीय राज्यमंत्री कपील पाटील यांच्या नेतृत्वात ठाणे जिल्ह्यात जन आशीर्वाद यात्रा आज काढली जात आहे. प्रथमच आगरी समाजाला केंद्रात मंत्री पद मिळाल्याने भाजप कार्यकर्ते आणि समाजातील नागरिक उत्साही आहेत.या यात्रेसाठी ठिकठिकाणी भाजपकडून बॅनरबाजी करण्यात आली आहे.तसेच कल्याण-शीळ रोडवर कपिल पाटील यांचे स्वागत आणि शुभेच्छाचे बॅनर लागले आहेत. विशेष म्हणजे शिवसेना नेत्याकडून बॅनर लावण्यात आल्याने आता याची चांगलीच चर्चा रंगू लागली आहे. शिवसेना माजी नगरसेवक दीपेश म्हात्रे आणि जयेश म्हात्रे यांच्यासह शिवसेनेचे माजी आमदार सुभाष भोईर, सुपूत्र सुमित भोईर यांचाकडून बॅनरबाजी करण्यात आली. (Shiv Sena leaders congratulate BJP's Union Minister of State)

हे देखील पहा -

केंद्रीय राज्यमंत्री कपील पाटील यांच्या नेतृत्वात ठाणे जिल्ह्यात जन आशीर्वाद यात्र आज काढली जाणार आहे. त्यामुळे भाजप कडून सर्व ठिकाणी बॅनरबाजी केली जात आहे. मात्र शिवसेना माजी नगरसेवक दीपेश म्हात्रे आणि जयेश म्हात्रे यांच्यासह शिवसेनेचे माजी आमदार सुभाष भोईर यांनी लावलेल्या या बॅनरवर आता चांगलीच चर्चा रंगली आहे. सुभाष भोईर यांनी विकास कामे करून सुद्धा 2019 सालच्या विधानसभा निवडणूकीत एबी फॉर्म देऊन सुद्धा त्यांचे ऐनवेळी तिकीट कापले आणि रमेश म्हात्रे यांना तिकीट दिले. त्यामुळे भोईर हे शिवसेनेवर नाराज असल्याची चर्चा आहे. यावेळी शिवसेनेचा पराभव झाला आणि मनसेचा आमदार निवडून आला. तर खासदार आणि भोईर यांच्यात पटत नसल्याची चर्चा आहे. त्यामुळे भोईर हे भविष्यात भाजपमध्ये प्रवेश करतील अशीही चर्चा आता रंगू लागली आहे. त्यामुळे हा बॅनर शुभेच्छा देणारा बॅनर आहे की, शिवसेनेच्या माजी आमदारांनी काही राजकीय संकेत दिले आहेत, हे येणाऱ्या काळात उघड होणार आहे.

जन आशीर्वाद यात्राचे पहिला दिवसाचा मार्ग असा असणार

खिडकाळी मंदिर - देसाई नाका - पलावा चौक - काटई नाका - मानपाडेश्वर मंदिर - सोनारपाडा साई मंदिर - डी.एन्.एस्.चौक - भाजपा डोंबिवली ग्रामीण मंडळ कार्यालय - दावडी नाका - विको नाका - टाटा नाका - सूचक नाका - चक्की नाका - तिसाई मंदिर, तिसगांव ते आमदार गणपत गायकवाड यांचे कार्यालय अशा पद्धतीने ५ दिवसीय यात्रेतील पहिला दिवस पार पडणार आहे.

Edited By - Akshay Baisane