MNS vs BJP : हिंमत असेल तर गुजरातीऐवजी मराठी माणसाला पंतप्रधान करा; दीपोत्सवावरुन मनसे-भाजपमध्ये जुंपली

MNS vs BJP Clash

राज्यात एकीकडे दिवाळीचा सण उत्साहात साजरा केला आहे. तर दुसरीकडे भाजप आणि मनसेमध्ये वादाचे फटाके फुटत आहेत. वसुबारसच्या दिवशी महाराष्ट्र नवनिर्माण सेनेकडून शिवाजी पार्कवर दीपोत्सव साजरा करण्यात आला. या दीपोत्सवाला हिंदी काही हिंदी कलाकारांना आमंत्रित करण्यात आलं होतं. यावरून भाजप नेते आशिष शेलार यांनी मनसे अध्यक्ष राज ठाकरे यांच्यावर निशाणा साधला.  ('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

शिवाजी पार्कवर (Shivaji Park) सलीम जावेदला घेऊन मनसेने दीपोत्सव साजरा केला, पण आमचे मराठी कलाकारही काही कमी नाहीत, असं आशिष शेलार यांनी म्हटलं. इतकंच नाही, तर आम्हीही एखाद्या कार्यक्रमाला सलीम खान आणि जावेद अख्तर यांना बोलवू. पण, तो कार्यक्रम दीपावलीचा नसेल, असा टोला आशिष शेलारांनी राज ठाकरेंना लगावला.

दरम्यान, आशिष शेलार यांच्या या टीकेचा मनसे नेते संदीप देशपांडे (Sandeep Deshpande) यांनी चांगलाच समाचार घेतला. आमच्या मराठी प्रेमाबद्दल प्रश्न उपस्थित करणाऱ्यांचं मराठी प्रेम हे पुतनामावशीच प्रेम आहे. हिम्मत असेल तर गुजराथी ऐवजी मराठी माणसाला पंतप्रधान करा, असं आव्हान संदीप देशपांडे यांनी भाजपला दिलं आहे.

मराठी कलाकारांवर अन्याय होतो तेंव्हा त्यांच्या पाठीशी कोण उभं राहत आणि कोण पाठीला पाय लावून पळत महाराष्ट्राला माहित आहे. दीपावलीच्या शुभेच्छा, असंही मनसे नेते संदीप देशपांडे यांनी आपल्या ट्वीटमध्ये म्हटलं आहे. त्यामुळे ऐन दिवाळीत मनसे आणि भाजपमध्ये आणखी वादाचे फटाके फुटण्याची शक्यता आहे.

आशिष शेलार काय म्हणाले होते?

दीपोत्सव करणाऱ्यांनी सलीम खान आणि जावेद अख्तर यांना घेऊन टिमकी वाजवून घेतली. पण, आमचे मराठी कलाकार छोटे नाहीत. मराठी कलाकारांच्या उपस्थितीत दीपोत्सव झाला पाहिजे, ही भाजपाची संकल्पना आहे, असं आशिष शेलार यांनी म्हटलं होतं. आम्हीही एखाद्या कार्यक्रमाला सलीम खान आणि जावेद अख्तर यांना बोलवू. पण, तो कार्यक्रम दीपावलीचा नसेल, असा टोलाही शेलार यांनी मनसेला लगावला होता.