Pune News : डिलिव्हरी बॉय म्हणून फिरायचा, संधी साधून मंगळसूत्र चोरायचा, एक चूक केली अन् तुरुंगात गेला

अक्षय बडवे, साम टीव्ही, प्रतिनिधी

पुणे : मॉर्निंग वॉकला गेलेल्या महिलेचे मंगळसूत्र हिसकावणाऱ्या आरोपीला पोलिसांनी १२ तासात जेरबंद केले आहे. कुणालाही संशय येऊ नये म्हणून आरोपी स्विगी कंपनीचा डिलिव्हरी बॉय म्हणून वावरत होता. आरोपीकडून २ लाख ५० हजार रुपये किंमतीचे २ तोळे सोने आणि एक दुचाकी गाडी जप्त करण्यात आली आहे. पुण्यातील सहकारनगर पोलिसांनी ही कारवाई केली आहे. अमोल नाकते असे आरोपीचे नाव आहे.

पोलिसांनी दिलेल्या माहितीनुसार, १६ मे रोजी सकाळी ६ वाजता फिर्यादी महिला हिलटॉप सोसायटी, सिध्दीविनायक मंदिरा जवळ धनकवडी येथे मॉर्निंग वॉकसाठी गेल्या होत्या. यावेळी एका दुचाकी वरुन आलेल्या अनोळखी तरुणाने त्यांच्या गळ्यातील सोन्याचे मंगळसुत्र जबरदस्तीने हिसका मारून तोडून चोरून नेले.

या घटनेचा तपास करत असताना पोलिसांनी परिसरातील १५० सीसीटीव्ही फुटेज तपासले. यावरून गुन्हा केलेला आरोपी हा स्विगी कंपनीचा डिलिव्हरी बॉय म्हणून फिरत असल्याचे निष्पन्न झाले. या आरोपीचा शोध घेत हा तरुण आंबेगाव पठार येथे कोणाची तरी वाट पाहत असल्याची माहिती पोलिसांना मिळाली. पोलिसांनी त्याठिकाणी तात्काळ धाव घेतली. पोलिस येताच त्याने तिथून पळ काढला. पोलिसांनी त्याच्या मागे जात त्याला ताब्यात घेतले.

चौकशी दरम्यान, त्याने या गुन्ह्याची कबुली देऊन 'मी सकाळी दुचाकी गाडीवरून आंबेगाव पठार धनकवडी भागात स्विगी डिलिव्हरी बॉय म्हणून फिरण्याचा बहाणा करीत असताना एक वयस्कर महिला रस्त्याने चालत होती त्या महिलेच्या गळयातील सोन्याचे मंगळसुत्र जबरदस्तीने हिसका मारून चोरी करून मी तेथून पळून गेलो' असे सांगितले. आरोपीकडून ९० हजार रूपये किंमतीचे २ तोळे सोने व गुन्हा करतेवेळी वापर केलेली एक दुचाकी गाडी व सोने गहाण ठेवून मिळालेली १ लाख रुपये रक्कम असा एकूण २ लाख ५० हजार रुपये किमतीचा माल जप्त करण्यात आला.