Pune Crime News : पुण्यातील स्वारगेट डेपोतील बलात्काराच्या घटनेनंतर 'साम'चे परखड सवाल

पुण्यातल्या स्वारगेटमध्ये काल पहाटे साडेपाचच्या दरम्यान एका २६ वर्षीय तरुणीवर बलात्कार झाल्याची घटना आज उघडकीस आली आहे.

पीडित तरुणीही काल पहाटे फलटणला पुण्याहून निघाली होती. त्याच दरम्यान बस डेपोमध्ये हा प्रकार घडला.

घडलेल्या प्रकारामुळे पीडितेला मानसिक धक्का बसला. ही तरुणी बसमधून बाहेर पडली आणि दुसऱ्या बसमध्ये जाऊन बसली. त्या बसने ती फलटणला तिच्या गावी गेली.

स्वारगेट बस डेपोमध्ये तरुणीवर बलात्कार करणाऱ्या आरोपीचे नाव 'दत्तात्रय गाडे' आहे अशी माहिती समोर आली आहे. हा सराईत गुन्हेगार असून त्याच्यावर याआधीही अनेक गंभीर गुन्ह्यांची नोंद आहे.

पीडित तरुणीची ससून रुग्णालयात वैद्यकीय चाचणी झाली. संध्याकाळी या चाचणीचे रिपोर्ट्स येणार असल्याचे म्हटले जात आहे.

हा गंभीर प्रकार झाल्यानंतरही राज्याचे परिवहन मंत्री प्रताप सरनाईक गप्प का बसले आहेत? असा प्रश्न उपस्थित केला जात आहे.

शिवशाही बसमध्ये पहाटेच्या सुमारास बलात्कार झाला. रात्रीच्या वेळी बस डेपोमध्ये सुरक्षा रक्षक नव्हते का?

ज्या बसमध्ये हा प्रकार घडला त्या बसच्या दरवाजाला कुठल्याच प्रकारचे लॉक नव्हते. दरवाजा उघडा असूनही आतल्या केबिनच्या दरवाजाला लॉक नसून एक दोरी बांधल्याचे उघडकीस आले आहे.

स्वारगेट बस डेपोमध्ये ज्या वेळेसही धक्कादायक घटना घडली, तेव्हा एसटी डेपोमध्ये परिवहन विभागाचे सुरक्षा रक्षक नव्हते का?