Pune Rave Party: खराडी रेव्ह पार्टी प्रकरणात मोठी अपडेट, त्याच सूटमध्ये २४ तास आधीही रंगली होती पार्टी

Summary -

• पुण्यातल्या खराडीमधील त्या सूटवर शुक्रवारी देखील रंगली होती पार्टी

• ३ दिवसांसाठी हा सूट करण्यात आला होता बुक

• शुक्रवारी पार्टी झाल्यानंतर शनिवारच्या पार्टीवर पोलिसांचा छापा

• शुक्रवारच्या पार्टीत सहभागी झालेल्यांची चौकशी होणार

अक्षय बडवे, पुणे

पुण्यातील ड्रग्स पार्टी प्रकरणात मोठी अपडेट समोर आली आहे. या प्रकरणात पोलिसांनी ७ जणांना अटक केली असून आरोपी सध्या पोलिस कोठडीत आहेत. शनिवारच्या पार्टीपूर्वी शुक्रवारीसुद्धा खराडीतील सूटमध्ये पार्टी रंगली होती अशी माहिती समोर आली आहे. शुक्रवारी झालेल्या या पार्टीची देखील पुणे पोलिस चौकशी करणार आहेत. या पार्टीमध्ये कोण-कोण सहभागी झाले होते याची माहिती घेऊन पोलिस या सर्वांची चौकशी करणार आहेत.

शनिवारी खराडीमध्ये झालेल्या रेव्ह पार्टीवर पुणे पोलिसांनी छापेमारी करत कारवाई केली होती. या प्रकरणाच्या तपासादरम्यान पोलिसांना शुक्रवारी झालेल्या पार्टीची माहिती मिळाली. आता पुणे पोलिस शुक्रवार आणि शनिवार या दोन्ही दिवशी रंगलेल्या पार्टीसंदर्भात चौकशी करणार आहेत. या दोन्ही दिवसांचे हॉटेलमधील सीसीटीव्ही फुटेजची पोलिस तपासणी करणार आहेत. त्याद्वारे शुक्रवारी पार्टीला कोण सहभागी झाले होते हे कळेल. त्या सर्वांची पोलिस चौकशी करतील.

राष्ट्रवादी काँग्रेस शरद पवार गटाचे नेते एकनाथ खडसे यांचे जावई आणि रोहिणी खडसे यांचे पती प्रांजल खेवलकर यांनीच या पार्टीचे आयोजन केले होते. प्रांजल खेवलकर यांनी ३ दिवसांसाठी खराडीमधील २ सूट बुक केले होते. शुक्रवार, शनिवार आणि रविवार असे ३ दिवसांच्या पार्टीचे नियोजन करण्यात आले होते. शुक्रवारी खराडीतील सूटमध्ये त्यांनी पार्टी केली पण शनिवारी सुरू असलेल्या पार्टीवर पुणे पोलिसांनी कारवाई केली आणि सर्वांना अटक केली.

दरम्यान, पुण्यातील रेव्ह पार्टी प्रकरणी पोलिसांनी ७ जणांना अटक केली आहे. यामध्ये २ महिला आणि ५ पुरूषांचा समावेश आहे. खराडीतील स्टेबर्ड अझुर सूट याठिकाणी ही रेव्ह पार्टी सुरू होती. पुणे पोलिसांच्या गुन्हे शाखेला या पार्टीविषयी माहिती मिळाली होती. त्यानंतर पोलिसांनी घटनास्थळी धाव घेत मध्यरात्री ३.२० वाजता कारवाई केली. ७ जणांकडून कोकेन सदृश पदार्थ जप्त करण्यात आले. आरोपींकडून ४१ लाख रुपयांचा मुद्देमाल जप्त करण्यात आला. ज्यामध्ये २.७० ग्रॅमचे कोकेन सदृश पदार्थ, ७० ग्रॅम गांजा सदृश पदार्थ जप्त, आरोपींचे १० मोबाईल, दोन चारचाकी वाहने, हुक्कापॉट सेट, दारू आणि बिअरच्या बॉटल्स, हुक्का फ्लेवर हे पोलिसांनी जप्त केले.