Shocking : राजगडावर चढताना धाप लागली अन् खाली कोसळला, २१ वर्षीय तरुणाचा दुर्दैवी मृत्यू

सागर आव्हाड, पुणे

राज्यात सलग आलेल्या सुट्ट्यांमुळे नागरिक फिरण्याचा मनमुराद आनंद लुटत आहे. २३ जानेवारीपासूनच पर्यटन स्थळांवर ठिकठिकाणी पर्यटकांची गर्दी पाहायला मिळत आहे. अशातच किल्ले राजगड येथे पर्यटनासाठी आलेल्या बेळगाव तालुक्यातील २१ वर्षीय युवकाचा किल्ला चढताना दुर्दैवी मृत्यू झाल्याची घटना रविवारी दुपारी साडेअकरा ते बारा वाजण्याच्या सुमारास घडली. प्राथमिक अंदाजानुसार हृदय विकाराच्या झटक्याने मृत्यू झाला असल्याची माहिती वेल्हे पोलिसांनी दिली.नागराज गुरू कोरी (वय.२१) असे मृत्यू झालेल्या युवकाचे नाव आहे.

पोलिसांनी दिलेल्या माहितीनुसार, नागराज चार मित्रांसह किल्ले येथे पर्यटनासाठी काल सकाळी आला असता गुंजवणे मार्गे किल्ला सर करत गुंजवणे दरवाजा जवळ आल्यानंतर, त्याला धाप लागून त्याच्या छातीत दुखू लागले. दरम्यान काही वेळ थांबल्यानंतर तो पुन्हा किल्ला चढू लागला. त्यावेळी मात्र त्याच्या छातीत पुन्हा दुखू लागले आणि उलटी होऊन तो बेशुद्ध पडला.

यावेळी सोबतच्या मित्रांनी 112 नंबरवर संपर्क साधल्यानंतर वेल्हे पोलीस स्टेशनचे पोलीस हवालदार सोमेश राऊत यांनी किल्ल्यावर असणाऱ्या पुरातत्व विभागाच्या कर्मचारी विशाल पिलावरे यांच्याशी संपर्क साधला. विशाल याने प्रकाश ढेबे याच्यासह गडावर असलेले पर्यटक युवराज पाटील, अनिकेत पासलकर ,समीर कामठे, गणेश दीक्षित यांच्या सहाय्याने स्ट्रेचरवरून नागराज यास गडाच्या खाली आणले.

यावेळी खाली उपस्थित असलेल्या हवलदार राऊत यांनी नागराज यास तात्काळ वेल्हे येथील ग्रामीण रुग्णालयांमध्ये उपचारासाठी दाखल केले. दवाखान्यांमध्ये उपस्थित असलेले वैद्यकीय अधिकारी डॉ. ज्ञानेश्वर हिरास यांनी तपासणी केली असता दवाखान्यात येण्यापूर्वी नागराजचा मृत्यू झाला असल्याची माहिती दिली. दरम्यान वेल्हे पोलीस ठाण्याचे हवालदार सोमेश राऊत अधिक तपास करीत आहेत.