Pune Police : कोयता गँगविरोधात पुणे पोलीस ॲक्शन मोडवर, दहशत पसरवणाऱ्या गुडांवर केली कारवाई

नितीन पाटणकर, साम टीव्ही, प्रतिनिधी

Pune Police News : काल पिंपरी चिंचवडमध्ये एका कार्यक्रमामध्ये उपमुख्यमंत्री आणि पुण्याचे पालकमंत्री अजित पवार यांनी पुणे पोलीस आयुक्त अमितेश कुमार यांना पुण्यातील वाढत्या गुन्हेगारीच्या मुद्द्यावरुन सुनावले होते. त्यातही कोयता गँगला आवर घालण्यावरुन पवार यांनी पोलिसांना सूचनादेखील दिल्या होत्या. यामुळे पुणे पोलीस ॲक्शन मोडवर आल्याचे म्हटले जात आहे.

पुण्यात वाहनांची तोडफोड करणाऱ्या टोळक्यांना त्यांच्या वस्तीमध्ये जाऊन पोलिसांनी सज्जड दम दिला. वाहनांची तोडफोड केल्यास धिंड काढली जाईल आणि चौकात जाहीरपणे फटके दिले जातील असा इशाराही पोलिसांनी दिला आहे. बिबवेवाडी पोलीस स्टेशन अंतर्गत गोळीबार करुन खूनाचा प्रयत्न करणाऱ्या आरोपीला पोलिसांनी अटक केली आहे. त्याच्याकडून पोलिसांनी धारदार शस्त्र आणि गावठी कट्टा जप्त केला आहे.

वाहन तोडफोडीच्या घटनांवरुन उपमुख्यमंत्री अजित पवार यांनी जाहीरपणे पुण्याचे पोलीस आयुक्तांना दम भरला होता. 'पुण्यात वाहनांची तोडफोड करणाऱ्यांचा, कोयता गँगचा बंदोबस्त करा. मकोका लावा काय करायचे ते करा. आम्ही तुम्हाला काहीही कमी पडू देणार नाही', असे वक्तव्य अजित पवार यांनी केले होते.

'आरोपीला पकडल्यावर त्याची शहरात अशी धिंड काढा. अख्या शहराला कळलं पाहिजे चुकल्यावर काय होतं ते' असेही उपमुख्यमंत्री अजित पवार म्हणाले होते. काल केलेल्या सूचनांची अंमलबजावणी आजपासूनच करायला पुणे पोलिसांनी सुरुवात केली आहे. पोलिसांनी दहशत करणाऱ्यांची मिरवणूक काढून सज्जड दम भरला आहे.