Pune Crime News : पुण्यातल्या लाडक्या बहिणी असुरक्षित? दररोज महिला होतेय वासनेची शिकार, अत्याचाराच्या घटनांची आकडेवारी समोर

सचिन जाधव, साम टीव्ही, प्रतिनिधी

Pune Crime : पुण्यात स्वारगेट बस डेपोमध्ये एका २६ वर्षीय तरुणीवर बलात्कार झाल्याच्या घटनेने राज्यभरात संताप व्यक्त केला जात आहे. या प्रकरणाने एकच खळबळ उडाली आहे. पोलिस या प्रकरणातील आरोपी दत्तात्रय गाडे याचा शोध घेत आहेत. मागील ४८ तासांपासून हा आरोपी फरार आहे. तो ऊसाच्या शेतात लपल्याचा संशय व्यक्त केला जात आहे.

याच दरम्यान पुण्यात बलात्कार आणि विनयभंगाची धक्कादायक आकडेवारी समोर आली आहे. या आकडेवारीनुसार, पुण्यामध्ये दर दिवसाला एकापेक्षा अधिक बलात्कार आणि विनयभंगाच्या घटना घडल्या आहेत. १ जानेवारी ते १८ फेब्रुवारी २०२५ या दरम्यान तब्बल १२५ घटनांची नोंद झाल्याची माहिती उघडकीस आली आहे.

पुण्यामध्ये दोन वर्षांमध्ये तब्बस ९१५ बलात्कार झाल्याच्या घटनांची नोंद झाली आहे. तर दीड हजार महिलांचे विनयभंग झाल्याची आकडेवारी समोर आली आहे. सरासरी पाहता दर दिवसाला एकापेक्षा अधिक अत्याचाराच्या घटना पुण्यात घडल आहेत. स्वारगेट बस डेपो बलात्कार प्रकरणानंतर ही धक्कादायक आकडेवारी समोर आली आहे.

स्वारगेट बस डेपोमध्ये झालेल्या बलात्कार घटनेनंतर ही धक्कादायक आकडेवारी समोर आल्याने पुण्यात महिलांच्या सुरक्षेचा प्रश्न ऐरणीवर आला आहे. समाजातील ही विकृती ठेचायचे आव्हान पोलीस आणि प्रशासनासमोर आहे. यावर महायुती सरकार काय अ‍ॅक्शन घेणार याकडे सर्वांचे लक्ष लागले आहे.