Pune Crime News: मी इथला भाई! कोयत्याचा धाक दाखवून आधी जबरदस्ती लिफ्ट, नंतर डिलिव्हरी बॉयला लुटले

सचिन जाधव, पुणे

Pune News: पुण्यामध्ये (Pune) कोयता गँगची (Koyta Gang) दहशत कायम असल्याचे चित्र पाहायला मिळत आहे. पुण्यामध्ये कोयत्याचा धाक दाखवून झोमॅटोच्या डिलिव्हरी बॉयला (Zomatos delivery boy) जबरदस्ती लिफ्ट मागितली. त्यानंतर त्याला लुटल्याचा प्रकार समोर आला आहे. याप्रकरणी पुणे पोलिसांनी (Pune Police) आरोपीला अटक केली आहे.

मिळालेल्या माहितीनुसार, पुण्यात कोयत्याचा धाक दाखवून झोमॅटो डिलिव्हरी बॉयकडून जबरदस्तीने लिफ्ट घेऊन त्याला कोयत्याचा धाक दाखवून लुटले. ही घटना पुण्याच्या बालाजीनगर येथे बुधवारी रात्री ११ वाजता घडली होती. याप्रकरणी सहकारनगर पोलिसांनी आरोपीला अटक केली. हर्षद राजेंद्र देशमुख (वय २७, रा. चव्हाणनगर, धनकवडी) असे अटक करण्यात आलेल्या आरोपीचे नाव आहे.

याप्रकरणी फिर्यादीने सहकारनगर पोलीस ठाण्यात तक्रार दाखल केली होती. फिर्यादी हा झोमॅटो कंपनीत डिलिव्हरी बॉय म्हणून काम करतात. सागर लॉजमध्ये ते बुधवारी रात्री पार्सल देऊन परत येत होते. मोटार सायकलवरुन जात असताना हर्षद देशमुख हा अचानक त्यांच्या मोटारसायकलवर बसला.

फिर्यादीला कोयत्याचा धाक दाखवून माझे नाव हर्षद देशमुख आहे. मी इथला भाई आहे. तू जर मला चव्हाणनगर येथे नेऊन सोडले नाही तर तुला मारुन टाकेन, असे म्हणत त्याने शिवीगाळ केली. जबरदस्ती फिर्यादीला मोटारसायकल चव्हाणनगरमधील शनि मंदिराजवळ नेण्यास भाग पाडले.

तेथे आल्यावर फिर्यादी यांना कोयत्याचा धाक दाखवून त्यांच्याकडील मोबाईल जबरदस्तीने हिसकावून घेतला. त्यानंतर घटनास्थळी जमलेल्या लोकांच्या दिशेने हवेत कोयता फिरवून दहशत निर्माण केली. याप्रकरणी गुन्हा दाखल करत पोलिसांनी आरोपी हर्षद देशमुखला अटक केली.