Pune Crime News : पुण्यात शाळकरी मुलीवर लैंगिक अत्याचार, ६७ वर्षीय आरोपीला अटक

अक्षय बडवे, पुणे

पुण्यामध्ये गुन्हेगारीच्या घटना वाढत चालल्या आहेत. चोरी, दरोडा, कोयता हल्ला, हत्या आणि अत्याचार यासारख्या घटना रोज समोर येत आहेत. अशामध्ये पुण्यामध्ये एका ११ वर्षांच्या शाळकरी मुलीवर लैंगिक अत्याचार करण्यात आल्याची धक्कादायक घटना समोर आली आहे. पुण्यातील खडकवासला परिसरात ही घटना घडली आहे. याप्रकरणी ६७ वर्षांच्या व्यक्तीविरोधात गुन्हा दाखल करत त्याला अटक करण्यात आली आहे. या घटनेमुळे पुण्यात खळबळ उडाली आहे.

मिळालेल्या माहितीनुसार, पुण्यातील खडकवासला परिसरात इयत्ता पाचवीमध्ये शिकत असलेल्या ११ वर्षांच्या मुलीवर लैंगिक अत्याचार करण्यात आला आहे. एका विकृत नराधमाकडून खाऊसाठी पैसे देण्याचे आमिष दाखवून या चिमुकलीवर लैंगिक अत्याचार करण्यात आले आहेत. या घटनेमुळे खडकवासला परिसरामध्ये खळबळ उडाली आहे. याप्रकरणी हवेली पोलिस ठाण्यात दिलीप नामदेव मते या ६७ वर्षीय नराधमाविरोधात गुन्हा दाखल करण्यात आला आहे. आरोपीला पोलिसांनी बेड्या ठोकल्या आहेत.

आरोपीने खाऊसाठी पैसे देण्याचे सांगून या ११ वर्षांच्या चिमुकलीला घरात नेऊन तिच्यावर लैंगिक अत्याचार केले. पीडित मुलीने शाळेमधील शिक्षिकेला ही माहिती दिली. त्यानंतर पीडित मुलीच्या कुटुंबीयांना ही माहिती सांगण्यात आली तेव्हा त्यांना मोठा धक्का बसला. शिक्षिका, मुख्याध्यापक आणि मुलीच्या पालकांनी हवेली पोलिस ठाण्यामध्ये धाव घेत तक्रार दाखल केली. घटनेचे गांभीर्य लक्षात घेता पोलिसांनी तात्काळ गुन्हा दाखल करत आरोपी दिलीप नामदेव मतेविरोधात गुन्हा दाखल करत अटक केली. पुढील तपास हवेली पोलीस करत आहेत.