Pune Crime News: आधी डांबून ठेवलं मग अंगावर श्वान सोडले; पुण्यात २ महिला अधिकाऱ्यांना घृणास्पद वागणूक, नेमकं काय घडलं?

अक्षय बडवे

Pune Crime:

पुण्यात एक धक्कादायक घटना घडली आहे. वीजबिलाची थकबाकी मागण्यासाठी गेलेल्या दोन महीला अधिकाऱ्यांना डांबून ठेवण्यात आलं आहे. पोलिसांना या घटनेची माहिती मिळताच त्यांनी घटनास्थळी धाव घेतली. त्यानंतर दोन्ही महिलांची सुटका करण्यात आली आहे. (Latest Marathi News)

पुण्यातील डेक्कन परिसरात ही घटना घडलीये. वीजबिलाची थकबाकी असल्याने बोदे यांचा वीज पुरवठा खंडीत करण्यात आला होता. त्यांच्याकडे ५ हजार २०६ रुपये वीजबिल थकलेलं आहे. हे वीजबिल लवकरात लवकर पूर्ण करा असं महिला अधिकाऱ्यांनी सांगितलं होतं. मात्र यावेळी बोदे कुटुंबियांडून करुणा आधारी आणि रूपाली कुटे या दोन महिला अधिकाऱ्यांना शिविगाळ करण्यात आली.

पुढे त्यांनी दोन्ही महिलांना शासकीय काम करत असतानाच डांबून ठेवलं. कुटे कुटुंबियांची क्रूरता एवढ्यावरच थांबली नाही. त्यांनी महिलांच्या अंगावर श्वान देखील सोडले. या घटनेची माहिती पोलिसांना समजल्यावर त्यांनी घटनास्थळी धाव घेतली. तसेच दोन्ही महिला अधिकाऱ्यांची सुटका केली.

डेक्कन पोलीस स्टेशनमध्ये ललित बोदे आणि आरती बोदे यांच्याविरोधात गुन्हा दाखल करण्यात आला आहे. या घटनेमुळे परिसरत एकच खळबळ उडाली आहे. पोलीस या प्रकरणी अधिक तपास करत आहेत.