पुण्यातील २ पोलिसांचे तडकाफडकी निलंबन, पोलिस दलात मोठी खळबळ; नेमकं प्रकरण काय?

पुणे पोलीस दलातून खळबळ उडवणारी बातमी समोर येत आहे. गुन्हे शाखा युनिट -१ मधील २ पोलीस कर्मचाऱ्यांना निलंबित करण्यात आलं आहे. मटका जुगार चालवणाऱ्या रॅकेटशी संपर्क ठेवल्याच्या गंभीर आरोपांवरून त्यांना निलंबित करण्यात आल्याची माहिती समोर आली आहे. मिळालेल्या माहितीनुसार, दोन्ही पोलीस कर्मचाऱ्यांवर ही कारवाई गुन्हे शाखेचे पोलीस उपायुक्त निखिल यांनी केली आहे. पोलीस हवालदार शुभम जयवंत देसाई आणि अभिनव बापुराव लडकत अशी निलंबित झालेल्या पोलिसांची नावे आहेत.

प्राथमिक माहितीनुसार, समर्थ पोलिसांनी १७ नोव्हेंबर रोजी अवैध मटका जुगार चालवणाऱ्या दोन जणांना ताब्यात घेतलं होतं. पोलिसांनी या प्रकरणाचा अधिक तपास केला. तपासादरम्यान, यातील एकाचा मोबाईल तपासला असता त्याच्या मोबाईलमध्ये पोलीस कर्मचाऱ्यांशी संपर्क झाल्याचे आढळून आलं.

अधिक पडताळणी करीत असताना हवालदार शुभम देसाई हे आरोपीच्या मोबाईलवर कॉल करत होते. या कॉलवर ते आरोपीबरोबर संशयास्पदरित्या संपर्कात होते हे दिसून आलं. हा संपर्क संशयास्पद पद्धतीने असल्याचं पोलिसांनी नमूद केलं. या फोन कॉल्सवरून पोलिसाचे आरोपीशी आणि चालवित असलेल्या धंद्याशी संबंध असल्याचा संशय व्यक्त करण्यात आला.

यापूर्वी त्यांना वारंवार या संदर्भात सुचना दिल्या होत्या. तरी सुद्धा त्यांच्या वर्तनात सुधारणा झाल्याचे दिसून आलं नाही, असं पोलिसांनी सांगितलं. अखेर पोलिसांनी त्यांच्यावर कठोर कारवाई करण्याचा निर्णय घेतला. पोलीस हवालदार शुभम देसाई आणि अभिनव लडकत यांना तत्काळ निलंबित करण्यात आलं. या घटनेनंतर पोलीस दलात खळबळ उडाली आहे.