Pune : पुण्यात महिलेने मागवलेल्या सूपमध्ये सापडलं झुरळ, कॅम्प परिसरातील हॉटेलमधील किळसवाणा प्रकार समोर

अक्षय बडवे, साम टीव्ही, प्रतिनिधी

पुण्यातील गुडलक कॅफेमधील बनमस्कामध्ये काचेचा तुकडा आढळल्याे खळबळ उडाली. ही घटना ताजी असताना पुण्यात आणखी एक किळसवाणा प्रकार उघडकीस आला आहे. पुण्यातील कॅम्प परिसरातील भिवंडी दरबार हॉटेलमध्ये एका महिलेच्या सूपमध्ये झुरळ सापडल्याचे समोर आले आहे. महिलेच्या तक्रारीनंतर हॉटेलवर कारवाई झाल्याचे म्हटले जात आहे.

सूपमध्ये झुरळ आढळल्यानंतर ३१ वर्षीय महिलेने लष्कर पोलिस ठाण्यात तक्रार दिली. अन्न व औषध प्रशासनाच्या अहवालानंतर हॉटेलवर कारवाई करण्यात आली आहे. हॉटेल मालकासह व्यवस्थापकाच्या विरोधात गुन्हा दाखल करण्यात आला आहे. हा किळसवाणा प्रकार समोर आल्यानंतर परिसरात खळबळ उडाली आहे.

पोलिसांनी दिलेल्या माहितीनुसार, हा सगळा प्रकार १६ जून रोजी पुण्यातील कॅम्प परिसरात असणाऱ्या भिवंडी दरबार या हॉटेलमध्ये रात्री ९ च्या सुमारास घडला. फिर्यादी या त्यांच्या कुटुंबासह हॉटेल भिवंडी दरबार येथे जेवणासाठी गेल्या होत्या. मुख्य जेवणापूर्वी त्यांनी सूप मागवले होते. यावेळी सूपमध्ये त्यांना झुरळ आढळून आले. या गोष्टीची तक्रार केल्यानंतर हॉटेल व्यवस्थापकाने त्याची दखल न घेतल्यामुळे त्याठिकाणी पोलिसांना बोलावण्यात आले.

पोलिसांनी हे सूप जप्त केले व ते अन्न व औषध प्रशासनाकडे पाठवले. या सूपची तपासणी केल्यानंतर त्याबाबत अन्न व औषध प्रशासनाने प्रमाणपत्र दिले. त्यात हे सूप आरोग्यास अपायकारक असल्याचे आढळून आले आणि हॉटेल मालकावर गुन्हा दाखल करण्यात आला. हॉटेल व्यवस्थापनाकडून कसल्याही प्रकारची स्वच्छतेची दक्षता न घेता ग्राहकांच्या जीवितास अपायकारक खाद्य पदार्थ खाण्यास दिले व ग्राहकाच्या जीवितास धोका निर्माण केल्याने लष्कर पोलिस ठाण्यात गुन्हा दाखल करण्यात आला आहे.