Pune : पुणे पोलिसांची बुधवार पेठेत धाड, ११ बांगलादेशी महिलांना अटक

महाराष्ट्रात सध्या बांगलादेशी नागरिकांचा सुळसुळाट झालेला पाहायला मिळत आहे. काही दिवसांपूर्वी कोम्बिंग ऑपरेशन दरम्यान पुणे पोलिसांनी बुधवार पेठेतमधून दोन बांगलादेशी महिलांना ताब्यात घेऊन चार अल्पवयीन मुलींची सुटका केली होती. अशातच आता पुन्हा एकदा २२ महिलांना पोलिसांनी ताब्यात घेतले असून त्यातील ११ महिला बांगलादेशी असून खळबळजनक माहिती समोर आली आहे.

मिळालेल्या माहितीनुसार, आज फरासखाना, खडक पोलिसांनी बुधवार पेठेत छापेमारी केली. या छापेमारीत बोगस आधार कार्ड आणि कागदपत्रांच्या आधारे वास्तव्य करणाऱ्या ११ बांगलादेशी महिलांना पोलिसांनी ताब्यात घेतले आहे. अनधिकृतपणे वास्तव करून कुंटणखान्यात काम करत असल्याची माहिती आहे. याप्रकरणी कारवाई करत पोलिसांनी एकूण २२ महिलांना ताब्यात घेतले असून त्यातील ११ महिला बांगलादेशी असल्याचे तपासातून समोर उघड झाले आहे. या धक्कादायक घटनेनंतर पोलीस यंत्रणा खडबडून जागी झाली आहे.

११ फेब्रुवारी रोजी दोन बांगलादेशी महिलांना अटक

बुधवारी ११ फेब्रुवारी रोजी कायदा-सुव्यवस्था राखण्यासाठी आणि गुन्हेगारी प्रवृत्ती आळा घालण्याच्या अनुषंगाने पुणे पोलिसांच्या गुन्हे शाखा व परिमंडळ एकने पुणे शहरातील बुधवार पेठ परिसरात मध्यरात्री ‘कोम्बिंग ऑपरेशन’ राबवले. या ऑपरेशनमध्ये दोन बांगलादेशी महिलांना ताब्यात घेतले असून, चार अल्पवयीन मुलींची सुटका केली आहे; तसेच सात ग्रॅम चरस आणि नशेची इंजेक्शन्स जप्त करण्यात आली. मध्यरात्री १२ वाजल्यानंतर पहाटे चार वाजेपर्यंत बुधवार पेठेतील ४१ इमारतींमध्ये आणि गल्लीबोळांत पायी पेट्रोलिंग करून झाडाझडती घेण्यात आली. ७००पेक्षा अधिक नागरिकांची कसून चौकशी करण्यात आली.