Pune : इंडिगोच्या विमानाचे इमर्जन्सी लँडिंग, उड्डाण करताच तांत्रिक बिघाड; १९२ प्रवाशांचा जीव टांगणीला

सागर आव्हाड, पुणे

पुणे विमानतळावर रविवारी सकाळी इंडिगोच्या विमानाचे आपत्कालीन लँडिंग करण्यात आले. उड्डाण केल्यानंतर काही वेळातच विमानाच्या लँडिंग गिअरमध्ये तांत्रिक अडचण निर्माण झाली. मात्र, वैमानिकाने प्रसंगावधान राखत विमान पुन्हा पुणे विमानतळावर आणले. सकाळी ९ वाजून ४ मिनिटांनी विमानाचे सुरक्षित लँडिंग झाले. या विमानातील १९२ प्रवासी आणि कर्मचारी सुखरूप असल्याने मोठा अपघात टळला.

पुण्याहून गुवाहाटीकडे जाणारे इंडिगोचे 6E 0623 क्रमांकाचे विमान रविवारी सकाळी उड्डाण करून काही अंतरावर गेले होते. त्यानंतर विमानाची चाके आत घेतली जात नसल्याचे वैमानिकाच्या लक्षात आले. त्यामुळे त्यांनी तातडीने पुणे विमानतळावरील एटीसीला याची माहिती दिली. घटनेची माहिती मिळताच विमानतळ प्रशासनाने तातडीने हालचाली सुरू केल्या. भारतीय हवाई दलाकडून पूर्ण आपत्कालीन स्थिती जाहीर करण्यात आली. तसेच कोणतीही दुर्घटना घडू नये, यासाठी अग्निशमन दलाची वाहने, रुग्णवाहिका आणि बचाव पथके धावपट्टीजवळ तयार ठेवण्यात आली.

विमानाच्या चाकांची स्थिती तपासण्यासाठी वैमानिकाने विमानाची धावपट्टीवरून कमी उंचीवरून फेरी मारली. यामुळे विमानाचे लँडिंग गिअर व्यवस्थित आहे की नाही, हे पाहणे शक्य झाले. त्यानंतर विमानाला उतरवण्याची परवानगी देण्यात आली. अखेर सकाळी ९ वाजून ४ मिनिटांनी विमानाने सुरक्षितपणे जमिनीवर उतरण्यास यश मिळवले. लँडिंगनंतर तीन अग्निशमन गाड्या आणि दोन रुग्णवाहिकांच्या मदतीने विमानाला पार्किंगच्या जागेपर्यंत नेण्यात आले. सर्व काही सुरक्षित असल्याची खात्री झाल्यानंतर सकाळी ९ वाजून १० मिनिटांनी आपत्कालीन स्थिती मागे घेण्यात आली.

यानंतर विमानाला एरोब्रिज लावून सर्व प्रवाशांना खाली उतरवण्यात आले. या घटनेत कोणालाही दुखापत झाली नाही. दरम्यान, प्रवाशांचा पुढील प्रवास सुरू राहावा यासाठी इंडिगोकडून दुसऱ्या विमानाची व्यवस्था केली जात आहे. बंगळुरूहून पर्यायी विमान पुण्यात आणून त्याद्वारे प्रवाशांना गुवाहाटीला पाठवण्यात येणार आहे.विमानतळ प्रशासन, हवाई दल, एटीसी आणि आपत्कालीन पथकांनी योग्य वेळी केलेल्या कामामुळे मोठी दुर्घटना टळली. सर्व १९२ जण सुरक्षित असल्याने प्रवाशांसह प्रशासनानेही सुटकेचा निःश्वास सोडला.