Maharashtra Police Bharti: अन् पोलीस व्हायचं स्वप्न अर्धवटच राहिलं; मैदानी चाचणी देताना उमेदवाराचा दुर्दैवी मृत्यू

संजय गडदे

Mumbai Police Bharti: पोलिस होण्याचे स्वप्न उराशी बाळगणाऱ्या कल्याण येथे राहणाऱ्या तरुणाचा मुंबईत कालिना मैदानावर पोलीस भरती दरम्यान मृत्यू झाला आहे. मृत पावलेला तरुण हा निवृत्त फौजी असून पोलीस बनण्याचे स्वप्न उराशी घेऊन मुंबईत आला होता. मात्र त्याचे पोलीस बनण्याचे स्वप्न स्वप्नच राहिले आहे.सचिन कदम हा तरुणाचा धावताना कोसळल्याने काल रुग्णालयात उपचारादरम्यान मृत्यू झाल्याची घटना घडली आहे. त्यामुळे परिसरात हळहळ व्यक्त होत आहे.

मुंबईत सध्या पोलीस भरतीसाठी कालिना ग्राऊंडवर मैदानी परीक्षा सुरू आहे. भरतीसाठी आलेल्या खेड तालुक्यातील दहिवली येथील रहिवासी असलेले सचिन कदम हे लष्करातून निवृत्त झाले आहेत. मागील काही दिवसांपासून ते कल्याण येथे वास्तव्यास होते. निवृत्ती घेतल्यानंतर त्यांनी पोलीस बनण्याचे स्वप्न उराशी बाळगून जोरदार तयारी सुरू केली.

काल ते पोलीस भरतीसाठी कालिना मैदानात परीक्षेसाठी आले होते. त्यानुसार १६०० मीटर धावताना ते तिसऱ्या राऊंडला कोसळले. त्याला तत्काळ जवळच्या वी.एन. देसाई रुग्णालयात दाखल केले असता डॉक्टरांनी त्याला मृत घोषित केले.

तापमानाचा पारा वाढलेला असल्यानेच धावताना भरतीसाठी आलेल्या तरुणांना भोवळ येण्याचे प्रमाण वाढले आहे. या आधी देखील १७ फेब्रुवारी रोजी वाशीमहून पोलीस भरतीसाठी आलेल्या गणेश उगले या तरुणाचा कालीना येथील मैदानात धावताना कोसळून मृत्यू झाला होता. तसेच अमर सोलंकी या अमरावतीच्या तरुणाचाही याच मैदानात २२ फेब्रुवारी रोजी मृत्यू झाला होता.