Pimpri Chinchwad : पिंपरी चिंचवडमधील कॅफेवर अचानक पोलीस धडकले; तरुण-तरुणींना रंगेहाथ पकडलं, परिसरात खळबळ

पिंपरी चिंचवड शहरात असलेल्या तब्बल ७ कॉफी शॉपवर गुरुवारी (ता.१५) अचानक पोलीस धडकले. यावेळी अनेक महाविद्यालयीन तरुण-तरुणी नको त्या अवस्थेत आढळून आले. पोलिसांनी त्यांना तातडीने ताब्यात घेतलं. याप्रकरणी कॅफे चालकांविरोधात भोसरी पोलीस ठाण्यात गुन्हा दाखल करण्यात आलाय. या घटनेनं परिसरात एकच खळबळ उडाली आहे.

पिंपरी चिंचवड (Pimpri Chinchwad) शहरात काही कॉफी शॉपच्या नावाखाली महाविद्यालयीन तरुण-तरुणींना प्रवेश दिला जात होता. गजबजलेल्या भागात असलेल्या कॉफी शॉपच्या पाठीमागच्या खोलीत तरुण-तरुणी अश्लील कृत्य करत असल्याच्या तक्रारी वाढल्या होत्या.

यासंदर्भात छावा मराठा युवा महासंघाचे धनाजी येळकर पाटील यांनी पोलिसांत तक्रार दाखल केली. तक्रार प्राप्त होताच पोलिसांनी ७ कॉफी शॉपवर (Coffee Shop) अचानक छापेमारी केली. यावेळी महाविद्यालयीन तरुण तरुणी नको त्या अवस्थेत आढळून आले.

अश्लील चाळे करणाऱ्या या प्रेमीयुगुलांना पोलिसांनी तातडीने ताब्यात घेतले. धक्कादायक बाब म्हणजे, काही कॅफे चालकांनी तरुण-तरुणींचा जणू एक प्रकारे लॉजसारखे वेगळे कंपार्टमेंट तयार करून दिले होते. त्यात त्यांना बसण्यासाठी विशेष सोय करून दिली होती.

कॅफेशॉप मधील प्रायव्हेट कंपार्टमेंटमध्ये बसण्यासाठी महाविद्यालयीन तरुणी-तरुणीकडून प्रत्येक तासाला २०० ते ५०० रुपये इतके शुल्क आकारले जात होते. पोलिसांनी या अश्लील कृत्याचा अड्डा उध्वस्त केला असून कारवाई करत ७ कॅफेचालकांविरोधात गुन्हा दाखल केला आहे.

Edited by - Satish Daud