Video : मुख्यमंत्र्यांच्या 'त्या' फोटोवरून जयंत पाटील यांनी साधला शिंदे सरकारवर निशाणा

ज्ञानेश्वर हिंगोलीकर

पुणे : पंतप्रधान नरेंद्र मोदी यांच्या अध्यतेखाली आज दिल्लीत निती आयोगाची सातवी बैठक पार पडली. सदर बैठक दिल्लीच्या राष्ट्रपती भवनाच्या सांस्कृतिक केंद्रात पार पडली. या बैठकीत देशातील बहुतांश मुख्यमंत्र्यांनी उपस्थिती दर्शवली. या बैठकीला राज्याचे मुख्यमंत्री एकनाथ शिंदे देखील उपस्थित राहिले. या निती आयोगाच्या बैठकीचा एक फोटा राज्याच्या राजकारण चर्चेचा विषय ठरला आहे. सदर निती आयोगाच्या बैठकीत मुख्यमंत्री एकनाथ शिंदे (Eknath Shinde) हे शेवटच्या रांगेत उभे आहेत. त्यावरून राष्ट्रवादी काँग्रेसचे प्रदेशाध्यक्ष जयंत पाटील (Jayant Patil) यांनी शिंदे सरकारवर निशाणा साधला आहे. (Jayant Patil news)

राष्ट्रवादी काँग्रेसचे प्रदेशाध्यक्ष जयंत पाटील यांनी आज पुणे पक्ष कार्यालयात राष्ट्रवादीच्या पदाधिकाऱ्यांशी संवाद साधला. आगामी महापालिका निवडणुका, बदललेली प्रभाग रचना आणि राजकीय विषयावर पदाधिकाऱ्यांसोबत चर्चा केली. सदर चर्चा झाल्यानंतर जयंत पाटील यांनी शिंदे सरकारवर जोरदार टीका केली.

जयंत पाटील म्हणाले, 'बघा ना, औरंगाजेबासमोर शिवाजी महाराजांना दुसऱ्या रांगेत उभे केले, त्यावेळी त्यांनी सभा सोडून दिली. आता किती बदला झाला आहे. किती झुकावं लागत आहे. दिल्लीचा दरबार पंतप्रधान नरेंद्र मोदींचा आहे. मात्र, याचं दु:ख वाटत आहे. मात्र, तिथला प्रोटोकॉल हा नावाच्या वर्णक्रमानुसार असतो. त्यामुळे मुख्यमंत्री एकनाथ शिंदे हे तिसऱ्या रांगेत असतील'.

जयंत पाटील पुढे म्हणाले, 'मुख्यमंत्री आणि उपमुख्यमंत्र्यांनी सातशे ते साडे सातशे निर्णय घेतले आहेत. तर निवडणुकीला घाबरून जाऊन प्रभाग रचना बदलल्या आहेत. भाजप आणि शिंदे गट यांनी एकत्र येऊन जे निर्णय घेतले आहे, त्याला लोकांचे समर्थन आहे की नाही यासाठी निवडणूका घ्याव्यात', असे ते म्हणाले. मंत्र्यांचे अधिकार सचिवांना देण्याच्या निर्णयावर भाष्य करताना जयंत पाटील म्हणाले, 'मंत्र्यांचे अधिकार सचिवांना दिले गेल्याचे असं मी कधी ऐकलं नाही. शिंदे सरकारची मंत्री नेमण्याची क्षमता नाही आहे, कायदा धाब्यावर बसवून सरकार चालवत आहेत'.

'एकनाथ शिंदे यांनी एवढी लांब उडी मारली आहे. कुणाची विचारधारा केव्हा बदलते सांगता येत नाही. एकनाथ शिंदे हे माझ्या शेजारी बसायचे, त्यांना कधी वाटलं नाही ते मुख्यमंत्री होईल. त्यांचा स्वभाव चांगला आहे. मात्र, त्यांनी जे केलं ते योग्य केलं नाही. सुप्रीम कोर्टाचा निकाल लागल्यावर सर्वच्या सर्व ४० आमदार हे उद्धव ठाकरे यांना भेटतील, त्याशिवाय त्यांना दुसरा पर्याय नाही', असेही पाटील म्हणाले.