Mumbai Bomb Threat: मुंबईला बॉम्बने उडवून देण्याची धमकी देणाऱ्याला अटक, उत्तर प्रदेश कनेक्शन उघड

मुंबईमध्ये गणपती विसर्जनादरम्यान बॉम्बस्फोट घडवून आणण्याची धमकी देणाऱ्याला पोलिसांनी बेड्या ठोकल्या आहेत. मुंबई पोलिसांच्या गुन्हे शाखेने उत्तर प्रदेशातील नोएडा येथून एकाला अटक केली. ५० वर्षीय अश्विन कुमार सुप्राने मुंबईला बॉम्बने उडवून देण्याची धमकी दिली होती. आरोपीने गुरूवारी मुंबईच्या वाहतूक पोलिसांच्या व्हॉट्सअपवर हा धमकीचा मेसेज पाठवला होता. त्यानंतर मुंबई पोलिस अलर्ट मोडवर आले होते. मुंबईतील सुरक्षा व्यवस्थेत वाढ करण्यात आली होती.

पोलिसांनी दिलेल्या माहितीनुसार, आरोपीला नोएडा येथून अटक करण्यात आली. आरोप अश्विन कुमार मूळचा बिहारचा रहिवासी आहे. धमकी पाठवण्यासाठी वापरण्यात आलेला मोबाइल आणि सिम कार्डवरून पोलिस आरोपीपर्यंत पोहचले. पोलिसांनी आरोपीचा मोबाइल आणि सिमकार्ड जप्त केले. आरोपीला अधिक चौकशीसाठी मुंबईत आणण्यात आले आहे.

गुरूवारी मुंबईत मानवी बॉम्बस्फोट करण्याच्या धमकीचा मेसेज मुंबई पोलिसांना आला होता. मुंबईच्या वाहतूक पोलिसांच्या व्हॉट्सअप हेल्पलाइनवर हा धमकीचा मेसेज आला होता. या धमकीच्या मेसेजमध्ये दावा करण्यात आला होता की, १४ दहशतवादी भारतामध्ये घुसले आहेत. ३४ गाड्यांमध्ये मानवी बॉम्ब असून ४०० किलोच्या आरडीएक्सच्या स्फोटाद्वारे मुंबई शहर हादरवले जाईल. या धमकीच्या मेसेनंतर मुंबईतील सुरक्षा व्यवस्था वाढवण्यात आली.

आरोपीने धमकीच्या मेसेजमध्ये त्याच्या संघटनेचे नाव लष्कर-ए-जिहादी असल्याचे सांगितले होते. या मेसेजनंतर मुंबई पोलिसांच्या गुन्हे शाखेने तपास सुरू केला होता. अवघ्या काही तासांमध्ये पोलिसांनी आरोपीला शोधून काढले. त्याला नोएडा येथून ताब्यात घेण्यात आले आहेत. सध्या पोलिस आरोपीची चौकशी करत आहेत. वरळी पोलिस ठाण्यात या व्यक्तीविरोधात भारतीय न्याय संहिताच्या कलम ३५१ आणि उपक्रम २,३ आणि ४ अंतर्गत गुन्हा दाखल करण्यात आला. नागरिकांनी अशा धमकीच्या खोट्या मेसेजवर विश्वास ठेवू नये असे आवाहन मुंबई पोलिसांनी केले आहे.