Mumbai Best Bus Accident: बसच्या चाकाखाली आली दुचाकी,चालकाचा कोपरापासून तुटला हात

संजय गडदे, साम प्रतिनिधी

मुंबईच्या अंधेरी पूर्वेकडील एमआयडीसी पोलीस ठाण्याच्या हद्दीतील साठे चौकात बेस्ट बसचा मोठा अपघात झाला. बेस्ट बसच्या चाकाखाली दुचाकी आल्यानं दुचाकीस्वार गंभीर जखमी झाला. या अपघातात दुचाकीस्वाराचा हात कोपरापासून तुटला. इस्माईल सुरतवाला (३५ वर्षे)या दुचाकी चालवणाऱ्याचं आहे.

याप्रकरणी एमआयडीसी पोलीस ठाण्यात बस चालक विजय युवराज पाटील (३६ वर्षे) याच्या विरोधात गुन्हा दाखल करण्यात आलाय. गुन्हा दाखल झाल्यानंतर एमआयडीसी पोलिसांनी बेस्ट बस चालक विजय पाटील याला अटक केली असून पोलीस अधिकचा तपास करत आहेत. आरटीआय कार्यकर्ते अनिल गलगली यांनी दाखल केलेल्या आरटीआयच्या उत्तरात बेस्टच्या प्रशासनाने ही माहिती दिली होती.

५ वर्षात ८३४ बेस्ट बस अपघात

मागच्या ५ वर्षांमध्ये बेस्टचे ८३४ बस अपघात झाल्याची माहिती बेस्ट प्रशासनाने दिलीय. यात ८८ जीवितहानी झाल्याची कबूलीही बेस्टने दिली आहे. मरणांकत आणि जखमींना एकूण ४२.४० कोटी रुपयांची आर्थिक नुकसान भरपाई देण्यात आलीय. या पाच वर्षात १४ चालकांना बडतर्फ करण्यात आलंय. तर २४ कर्मचाऱ्यांवर निलंबनाची कारवाई करण्यात आलीय.