Suryakanta Patil Join NCP: 'युद्धाच्या प्रसंगी मी आपल्यासोबत...', भाजपला सोडचिठ्ठी दिल्यानंतर सूर्यकांता पाटील यांचा शरद पवारांना शब्द| VIDEO

मुंबई, ता. २५ जून २०२४

नांदेडमध्ये भारतीय जनता पक्षाला मोठा धक्का बसला असून पक्षाच्या ज्येष्ठ नेत्या आणि माजी मंत्री सूर्यकांता पाटील यांनी आज राष्ट्रवादी शरदचंद्र पवार पक्षामध्ये जाहीर प्रवेश केला आहे. पक्षाचे अध्यक्ष शरद पवार, प्रदेशाध्यक्ष जयंत पाटील यांच्या उपस्थितीत हा पक्षप्रवेश सोहळा पार पडला. विधानसभेच्या तोंंडावर भाजपसाठी हा धक्का मानला जात आहे.

काही दिवसांपूर्वीच भारतीय जनता पक्षाला सोडचिठ्ठी दिल्यानंतर माजी मंत्री सूर्यकांता पाटील यांनी आज राष्ट्रवादी काँग्रेस शरद पवार गटात प्रवेश केला. सूर्यकांता पाटील यांनी आज एक महत्वाचा राजकीय निर्णय घेतला, त्यांच मी स्वागत करतो असे म्हणत शरद पवार यांनी यावेळी सूर्यकांता पाटील यांचे स्वागत केले.

शरद पवारांना दिला शब्द!

"माझ्या आयुष्याचा सर्वाधिक काळ साहेबांसोबत गेला. भविष्यातील लढाईसाठी मी तुमच्यासोबत आले आहे. देशासाठी अनेक लोक हुतात्मे झाले. या युद्धाच्या प्रसंगी मी आपल्यासोबत आहे. परतीचे दोन मी स्वत: कापले आहे. मी कधीच घराबाहेर पडले नाही. माझ्या अंतापर्यंत मी आपल्यासोबत असेन," असा शब्द सूर्यकांता पाटील यांनी दिला.

तसेच "मी रागात निघून गेले होते. ज्यांच्याकडे गेले तोंड दाखवंल नाही. मी शेतात राबले. ज्या घरातले लेकर पळून जातात. त्यांच्या बापाला असंच काम कराव लागतं. ज्या घरात मी गेले. तिथल्या लोकांनी माझ्यावर विश्वास टाकला नाही. बर झालं नाही तर विश्वासघात झाला असता," असेही त्या यावेळी म्हणाल्या.