Purandar Airport: विमानतळाच्या जमीन अधिग्रहणाचा तिढा सुटला; शेतकऱ्यांबाबत सरकारचा महत्त्वाचा निर्णय

सचिन जाधव, साम प्रतिनिधी

पुरंदर विमानतळाच्या जमीन अधिग्रहणाचा तिढा सुटलाय. आज मुंबईमध्ये मुख्यमंत्री देवेंद्र फडणवीस यांच्या उपस्थितीत सातही गावातील शेतकरी, आणि जिल्हाधिकाऱ्यासोबत झालेल्या बैठकीनंतर जमीन अधिग्रहणाचा तिढा सुटलाय. ज्या शेतकऱ्यांच्या शेतजमिनी विमानतळात जाणार आहेत, त्या शेतकऱ्यांसाठी सरकारनं महत्त्वपूर्ण निर्णय घेतलाय.

जमिनीचा एकरी राज्य शासनाने निश्चित केलेला दर वाढून मिळावा,विमानतळाच्या कंपनीमध्ये भागीदारी मिळावी,परताव्या पोटी दहा टक्के ऐवजी 35% जमीन मिळावी अशा विविध मागण्या या बैठकीत शेतकऱ्यांच्या वतीने करण्यात आल्या होत्या.त्यास मुख्यमंत्र्यांनी सकारात्मकतात दर्शवली आहे. याबाबतचा निर्णय आज मुख्यमंत्र्यांच्या उपस्थितीत सातही गावातील शेतकरी, जिल्हाधिकारी जितेंद्र डूडी, उद्योग मंत्री उदय सामंत, आमदार विजय शिवतारे यांच्या उपस्थितीत झालेल्या बैठकीत घेण्यात आला.

एकरी निश्चित करण्यात आलेला दर सुधारित करण्यात येईल,समृद्धी महामार्ग आणि नवी मुंबई विमानतळसाठी संपादन करताना मोबदल्यासाठी जे मॉडेल वापरले होते. त्या मॉडेलचा अभ्यास करून मोबदल्याचा दर निश्चित करण्यात येणार असल्याची ग्वाही मुख्यमंत्र्यांनी दिलीय. विमानतळामध्ये शेतकऱ्यांना भागीदारी देण्यासाठीचा प्रस्ताव तयार करण्यात येणार आहे. तसेच मोबदल्यापोटी शेतकऱ्यांना १० टक्के परतावा जमीन देण्यात येणार होती. त्यामध्ये सुद्धा वाढ करण्यात येईल, या मागणीलाही मुख्यमंत्र्यांनी मान्यता दिली आहे.

त्याचबरोबर विमानतळासाठी भूसंपादन करण्यात येणाऱ्या एकूण तीन हजार एकर जागेव्यतिरिक्त अन्य जागेवर जागेवरील सातबारा उताऱ्यावर जे भूसंपादनाची शिक्के मारले होते.ते सगळे शिक्के तातडीने रद्द करण्याच्या सूचनाही या बैठकीत मुख्यमंत्र्यांनी दिल्या आहेत. याशिवाय प्रस्तावित विमानतळामध्ये यासाठी गावातील स्थानिक तरुणांना रोजगार मिळावा यासाठी तातडीने स्किल सेंटर सुरू करण्यासही या बैठकीत मुख्यमंत्र्यांनी मान्यता दिली.

त्यामुळे पुरंदर विमानतळाच्या भूसंपादनातले सर्व अडथळे आता दूर झाले आहेत. जानेवारी म्हणजे नवीन वर्षात विमानतळाच्या प्रत्यक्ष भूसंपादनाला सुरुवात होणार असल्याचे जिल्हा प्रशासनाकडून या बैठकीनंतर सांगण्यात आले.