MPSC गट-क सेवा संयुक्त पूर्व परीक्षा 2026 अंतर्गत आता 16,717 जागा भरल्या जाणार
राज्यातील 25 प्रशासकीय विभागांमध्ये भरती प्रक्रिया राबवली जाणार
उमेदवारांना कमाल वयोमर्यादेत एक वर्षाची सूट देण्यात आली
महाराष्ट्र लोकसेवा आयोगामार्फत सरकारी नोकरीची तयारी करणाऱ्या तरुणांसाठी आनंदाची बातमी आहे. महाराष्ट्र गट-क सेवा संयुक्त पूर्व परीक्षा 2026 अंतर्गत भरती होणाऱ्या पदांच्या संख्येत मोठी वाढ करण्यात आली आहे. आधी जाहीर केलेल्या पदांमध्ये वाढ करून आता एकूण 16 हजार 717 जागा भरल्या जाणार आहेत. त्यामुळे सरकारी नोकरीच्या प्रतीक्षेत असलेल्या उमेदवारांना मोठी संधी उपलब्ध झाली आहे.
महाराष्ट्र लोकसेवा आयोगाने यासंदर्भात नवीन पत्रक प्रसिद्ध केले आहे. राज्यातील सरकारी भरती प्रक्रिया अधिक पारदर्शक व्हावी, यासाठी शासनाने स्थापन केलेल्या उच्चस्तरीय समितीने काही महत्त्वाच्या सूचना केल्या होत्या. त्यानंतर विविध विभागांकडून मिळालेल्या मागणीपत्रानुसार पदसंख्या वाढवण्याचा निर्णय घेण्यात आला.
आयोगाच्या माहितीनुसार, राज्यातील 25 प्रशासकीय विभागांमध्ये एकूण 16,717 पदे भरली जाणार आहेत. यामध्ये लिपिक-टंकलेखक पदांसाठी सर्वाधिक 3,966 जागा आहेत. वैद्यकीय शिक्षण आणि औषधी द्रव्ये विभागात 3,911 पदे भरली जाणार आहेत. तर महसूल विभागातील ग्राम महसूल अधिकारी म्हणजेच तलाठी पदांसाठी आता 1,840 जागा उपलब्ध झाल्या आहेत. या भरतीमध्ये विविध पदांसाठी सामाजिक आणि समांतर आरक्षणानुसार जागांचा तपशीलही देण्यात आला आहे. त्यामुळे उमेदवारांना आपल्या प्रवर्गानुसार उपलब्ध जागांची माहिती मिळवता येणार आहे.
या भरतीसाठी अर्ज करणाऱ्या उमेदवारांना आणखी एक महत्त्वाचा दिलासा मिळाला आहे. शासनाने कमाल वयोमर्यादेत एक वर्षाची सवलत देण्याचा निर्णय घेतला आहे. तसेच वाढीव जागांमुळे उमेदवारांना नव्याने अर्ज किंवा पदांचे विकल्प सादर करण्याची संधी मिळणार आहे. यासाठी 13 नोव्हेंबर ते 27 नोव्हेंबर 2026 या कालावधीत ऑनलाइन सुविधा उपलब्ध करून दिली जाणार आहे.
इच्छुक उमेदवारांनी MPSC च्या अधिकृत वेबसाइटला भेट द्यावी. त्यानंतर ONLINE FACILITIES मधील Online Application System हा पर्याय निवडावा. नवीन उमेदवारांनी New User Registration करून नोंदणी करावी. आधीच नोंदणी केलेल्या उमेदवारांनी लॉगिन करावे. त्यानंतर Online Application मध्ये जाऊन महाराष्ट्र गट-क सेवा संयुक्त पूर्व परीक्षा 2026 निवडावी आणि आवश्यक माहिती भरून अर्जाची प्रक्रिया पूर्ण करावी.
सकाळ+चे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.