बदलापूरच्या तुषार आपटेवरून महायुतीत बिनसलं; अजित पवारांच्या राष्ट्रवादी काँग्रेसचा थेट भाजपवर निशाणा

संघर्ष गांगुर्डे, साम टीव्ही

बदलापूर येथील बाल लैंगिक अत्याचार प्रकरणातील आरोपी तुषार आपटे याला भाजपचे प्रदेशाध्यक्ष रविंद्र चव्हाण यांनी स्वीकृत नगरसेवक केल्याच्या प्रकाराचा राष्ट्रवादी काँग्रेस अजित पवार गटाचे आमदार अमोल मिटकरी यांनी तीव्र निषेध केला आहे. केडीएमसी निवडणुकीच्या पार्श्वभूमीवर राष्ट्रवादीच्या उमेदवाराच्या प्रचारासाठी कल्याणमध्ये आले असताना त्यांनी ही प्रतिक्रिया दिली.

आमदार अमोल मिटकरी म्हणाले की, माणुसकीचा काळिमा फासणाऱ्या व्यक्तीला अशा पद्धतीने स्वीकृत नगरसेवक करणे म्हणजे संविधानाची आणि लोकशाही मूल्यांची पायमल्ली आहे. मुख्यमंत्री देवेंद्र फडणवीस यांनी या प्रकरणाची गंभीर दखल घ्यावी आणि आपल्या पक्षाची गरिमा जपावी, अशी अपेक्षाही त्यांनी व्यक्त केली.

यावेळी बोलताना आमदार मिटकरी यांनी भाजप आमदार महेश लांडगे यांच्यावरही जोरदार टीका केली. काही लोक जातीवादाच्या आधारावर निवडणूक लढवतात, असा आरोप करत त्यांनी सांगितले की, महेश लांडगे यांना इतका माज आणि मस्ती चढली आहे की ते थेट अजित पवार यांच्यावर खालच्या पातळीवर बोलू लागले आहेत.

'अरे तुरेची भाषा त्यांना येत असेल तर आम्हालाही येते,असे म्हणत त्यांनी लांडगे यांनी केलेल्या आक्षेपार्ह विधानाचा तीव्र निषेध केला. महिलांच्या कर्तृत्वावर प्रश्नचिन्ह उपस्थित करणारे वक्तव्य लाजिरवाणे असून, त्यांना त्यांची लायकी काय आहे ते पुण्यातील जनता दाखवून देईल, असा इशाराही आमदार अमोल मिटकरी यांनी दिला. राष्ट्रवादी काँग्रेसच्या टीकेनंतर भाजपकडून काय प्रत्युत्तर दिलं जातंय, हे पाहावे लागेल.