Ladki Bahin Yojana : लाडक्या बहिणींना १५०० रुपये अन् भावोजींना पाठवा दारूच्या आहारी; काँग्रेसची सरकारवर घणाघाती टीका

मुंबई : विधानसभा निवडणुकीत लाडक्या बहिणींनी महायुती सरकारला भरभरून मत दिलं. लाडक्या बहिणींच्या साथीमुळे महायुती सत्तेवर आली आहे. महायुतीचं सरकार स्थापन झाल्यानंतर लाडक्या बहिणींना हप्ता देखील मिळणे सुरु झाले आहेत. याचदरम्यान, सरकारच्या एका निर्णयावर काँग्रेसने जोरदार टीका केली आहे. 'राज्य सरकार लाडक्या बहिणींना १५०० रुपये देत आहे. तर भावोजींना दारूच्या आहारी पाठवत आहेत, अशा शब्दात काँग्रेसने फडणवीस सरकारवर टीका केली.

राज्य उत्पादन शुल्काच्या एका निर्णयाचा काँग्रेसने जोरदार विरोध केला. काँग्रेस नेते सचिन सावंत यांनी राज्य उत्पादन शुल्काच्या निर्णयावर राज्य सरकारवर जोरदार टीका केली. सचिन सावंत म्हणाले, 'एका बाजूला राज्यातील महिलांना लाडकी बहीण संबोधून ₹१५०० देत स्वतःला भाऊ म्हणवून घ्यायचे आणि दुसऱ्या बाजूला आपल्या भावोजींना दारुच्या आहारी पाठवत दारुडे करायचे. कित्येक महिला रोजंदारीवर काम करतात आणि त्यांचे पती मुले मारझोड करुन व्यसनासाठी पैसे हिसकावून घेतात'.

'दारुच्या व्यसनातून किती कुटुंब उद्ध्वस्त झाले आहेत. याची मोजणी करता येणार नाही. लाडकी बहीण योजना ही महिलांच्या उत्थानासाठी होती, असे म्हणणारे सरकार त्याच महिलांना करणार आहे, घरादारावर उठलेले हे सरकार भाऊ की वैरी हे आता भगिनींनी ओळखावे, असे ते पुढे म्हणाले.

'राज्य सरकारने आता व्यसनमुक्ती नशा मुक्ती कार्यक्रम बासनात गुंडाळून ठेवावे आणि खुलेआम "घरे बुडवा -दारु जिरवा" कार्यक्रम हाती घेऊन दारुचा प्रचार प्रसार सुरू करावा. जाहीर निषेध! योजनांना लागणारा निधी जमा करण्यासाठी लोकांची घरे उद्ध्वस्त करण्याऐवजी भ्रष्टाचार कमी केला तर अधिक चांगले राहील, असे सावंत पुढे म्हणाले. काँग्रेस नेते सचिन सावंत यांच्या टीकेनंतर महायुतीमधील नेत्यांकडून काय प्रत्युत्तर दिलं जातं, हे पाहावे लागेल.