Kalyan Dombivli News : 'त्या' ६५ इमारतींच्या प्रकरणात पुन्हा गडबड! ठाकरे गटाच्या नेत्यानं केला भयंकर प्रकाराचा गौप्यस्फोट

अभिजीत देशमुख, साम टीव्ही, प्रतिनिधी

Kalyan Dombivli : महारेरा घोटाळ्यामध्ये कल्याण-डोबिंवलीतल्या त्या ६५ इमारतींवर कारवाई होणार आहे. कारवाई होणार असल्याने इमारतींमधील ६५,००० रहिवाशांमध्ये चिंतेचे वातावरण आहे. हे प्रकरण ठाकरे गटाने लावून धरले आहे. आज डोबिंवलीमध्ये या रहिवाशांच्या सभेचे आयोजन करण्यात आले होते. या सभेत ठाकरे गटाचे जिल्हाप्रमुख दीपेश म्हात्रे यांनी खळबळजनक गौप्यस्फोट केला.

'कल्याण-डोबिंवलीमधल्या रहिवाशांची फसवणूक आजही होत आहे. या इमारतींचा बिल्डर न्यायालयात जाण्याच्या नावाखाली रहिवाशांकडून पैसे गोळा करत आहे. प्रत्येक इमारतीकडून २५ लाख रुपये गोळा करत आहेत. आतापर्यंत बिल्डरने दीड कोटी रुपये रहिवाशांकडून गोळा केले आहेत', असे दीपेश म्हात्रे यांनी म्हटले आहे. या फसवणूकीसंबंधित स्क्रीन शॉर्ट्स म्हात्रे यांनी भरसभेत सादर केले.

उद्यापासून डोंबिवलीतील चार पोलीस स्थानकांमध्ये या प्रकरणी रहिवाशांमार्फत तब्बल अडीच हजार तक्रारी अर्ज दाखल केले जाणार आहे असल्याची माहिती दीपेश म्हात्रे यांनी दिली आहे. बनावट पेपर बनवणाऱ्या टोळीच्या विरोधात पोलिसांनी कठोर कारवाई करावी, त्यांना तुरुगांत टाकावे अशी मागणी म्हात्रे यांनी केली आहे.

'६५ इमारतीत राहणाऱ्यांवर अन्याय होत आहे. शिवसेना ठाकरे गट या रहिवाशांसाठी न्यायालयीन लढाई लढणार आहे. आम्ही या प्रकरणात रस्त्यावरही उतरु. आजच्या सभेसाठी सर्व पक्षांना आवाहन केले होते. मात्र सत्ताधारी पक्षातील कोणीही इथे फिरकलं नाही याची खंत वाटते', असे वक्तव्य दीपक म्हात्रे यांनी केले आहे.