Kalyan : उमेदवारीसाठी काही पण! १० दिवसात २ वेळा झेंडा बदलला, शिवसेनेत तिकिट मिळेना म्हणून तुतारी हातात

संघर्ष गांगुर्डे, कल्याण

महाराष्ट्रात महानगरपालिकेच्या निवडणुकींसाठी सध्या धावपळ सुरु असल्याचे पाहायला मिळते आहे. नेते मंडळी प्रचार सभा, जागावाटप, फॉर्म भरण्यात व्यस्थ आहेत. तर काही पक्षांमध्ये फोडाफोडीचे नाटक सुरुच आहे. दरम्यान आज फॉर्म भरायचा शेवटचा दिवस असून येत्या १५ जानेवारीला निवडणुकीचा धुरळा उडणार आहे. तत्पूर्वी एका उमेदवाराने १० दिवसांत दुसऱ्या पक्षांत प्रवेश केल्याचे वृत्त आहे. महायुती महाविकास आघाडीमध्ये उमेदवारी न मिळालेल्या इच्छुक उमेदवारांनी आता पक्ष बदलाची तयारी सुरू केली, तर काहींनी अपक्ष निवडणूक लढवण्याचा निर्णय घेतला.

कल्याणमध्ये एका इच्छुकाने तर कहरच केला. दहा दिवसांपूर्वी उपमुख्यमंत्री एकनाथ शिंदे यांच्या एका सभेत बैल बाजार परिसरातील फैजल जलाल यांनी शिवसेना प्रवेश केला. मात्र तिकीट मिळत नाही, याचा अंदाज आल्यानेच त्यांनी काल चक्क राष्ट्रवादी शरद पवार गटाचे कार्यालय गाठले. त्या ठिकाणी राष्ट्रवादी काँग्रेस शरद पवार गटाचे प्रवक्ते महेश तपासे जिल्हाध्यक्ष वंडर पाटील यांचा उपस्थितीत राष्ट्रवादीतील प्रवेश उरकून घेतला. इतकेच नव्हे तर चक्क काही मिनिटात एबी फॉर्म देखील पटकावला.

फैजल जलाल यांच्या या झपाट्याने बदललेल्या भूमिकेमुळे कल्याणमधील राजकीय वर्तुळात जोरदार चर्चा सुरू झाली आहे. निष्ठा की उमेदवारी? असा सवाल उपस्थित करत अनेकांनी या पक्षांतरावर टीका केली आहे. 10 दिवसांत दोन पक्ष बदलल्याने त्यांची राजकीय विश्वासार्हतेवर प्रश्न निर्माण होत असल्याची चर्चा राजकीय जाणकारांकडून केली जात आहे.या घडामोडीमुळे येत्या निवडणुकीच्या पार्श्वभूमीवर कल्याणमधील राजकीय समीकरणे आणखी तापण्याची चिन्हे दिसत आहेत.