'मी घाबरणार नाही, त्यांच्यावर कारवाई करतच राहणार' : आयुक्त कल्पिता पिंपळे

ठाणे : कासारवडवली भागातील मार्केट परिसरात अनाधिकृत फेरीवाल्यावर कारवाई करताना सहाय्यक आयुक्त कल्पिता पिंपळे यांच्यावर फेरीवाल्याने चाकू हल्ला केला. या घटनेमुळे संपुर्ण राज्यातून संताप व्यक्त केला जात आहे. या हल्ल्यानंतर आयुक्त कल्पिता पिंपळे यांना उपचारासाठी रुग्णालयात दाखल करण्यात आले. त्यानंतर त्यांनी आपण अशा लोकांवर कारवाई करतच राहणार असल्याचे म्हटले आहे.

हे देखील पहा-

साम ला दिलेल्या मुलाखतीत त्यांनी म्हटले की, 'आम्ही अशा हल्ल्यांना घाबरणार नाही. मी बरी होवून पुन्हा कारवाई करणार. आम्ही अधिकारी आहोत आमचे कर्तव्य आम्ही करत राहणार अशा लोकांवर पुन्हा कारवाई करणार'.

दरम्यान, काल सायंकाळी, आयुक्त कल्पिता पिंपळे कासावडवली भागातील मार्केट परिसरात अनाधिकृत फेरीवाल्यावर कारवाई करण्यासाठी गेल्या होत्या. यावेळी त्यांचे पथकही त्यांच्या सोबत होते. मात्र एका फेरीवाल्यावर कारवाई करण्यासाठी पथक पुढे सरसावत असताना संतप्त फेरीवाल्याने, रागाच्या भरात पिंपळे यांच्यावर चाकूने हल्ला केला. फेरीवाल्याने हल्यातून बचावासाठी त्यांनी डोक्यावर हात धरला. मात्र त्या बचावात त्यांच्या हाताची बोटे तुटून पडली. तर या हल्याचा बचाव करण्यासाठी पुढे सरसावलेल्या त्यांच्या अंगरक्षकाच्याही डाव्या हाताचे एक बोट कापले गेले. त्यानंतर मात्र संबधित पथकाने अमरजित यादवला पोलिसांनी नागरिकांच्या मदतीने अटक केली.

Edited By- Anuradha