Ekvira Devi Temple: भाविकांसाठी आनंदाची बातमी, आई एकविरा देवीचे मंदिर राहणार २४ तास खुलं, प्रशासनाचा निर्णय

दिलीप कांबळे, साम टीव्ही

Ekvira Devi Temple News

महाराष्ट्रातील जागृत देवस्थान असलेले लोणावळ्यातील कार्ला गडावरील आई एकवीरा देवीचं मंदिर पुढील दोन दिवस २४ तास दर्शनासाठी खुलं राहणार आहे. नवरात्रीत भाविकांची गैरसोय होऊ नये म्हणून देवी संस्थानच्या वतीने हा निर्णय घेण्यात आला आहे. याबाबतची माहिती लोणावळा ग्रामीणचे पोलीस निरीक्षक किशोर धुमाळ यांनी दिली. (Latest Marathi News)

यंदा नवरात्रोत्सव थाटात साजरा होत असून ठिकठिकाणी दर्शनासाठी गर्दी करीत आहेत. त्यातच देवीच्या शारदीय नवरात्र उत्सवाचे आता शेवटचे दोन दिवस राहिले आहेत. या दोन दिवसात सुट्ट्या देखील असल्याने लोणावळ्यातील कार्ला गडावर येणाऱ्या भाविकांची गर्दी वाढत आहे. अनेक भाविक पहाटेच्या दर्शनासाठी रात्रीच गडावर येऊन बसत आहेत.

हीच बाब लक्षात घेता पुढील दोन दिवस एकवीरा आईचं मंदिर भाविकांसाठी २४ तास खुलं ठेवण्यात येणार आहे. दरम्यान, भाविकांनी देवीचं दर्शन घेतल्यानंतर जास्त वेळ गडावर थांबून गर्दी करू नये, रांगेत दर्शन घ्यावे, असं आवाहन मंदिर प्रशासन तसेच पोलिसांकडून करण्यात आलं आहे.