Pimpri-Chinchwad: पिंपरी चिंचवड शहरात पहिला तृतीयपंथीयांचा सामुदायिक विवाह सोहळा

पिंपरी चिंचवड शहर, जे उद्योगनगरी आणि कामगार नगरी म्हणून ओळखलं जातं, येथे पहिल्यांदाच तृतीयपंथीयांचा सामूहिक विवाह सोहळा पार पडला आहे. तृतीयपंथीयांना विवाहाचा हक्क मिळावा आणि त्यांना देखील विवाहाचे स्वप्न साकार व्हावे, या उद्देशाने 'परिवर्तनाचा पांयडा' या पिंपरी चिंचवड येथील 'नारी द वुमन' संस्थेने एक ऐतिहासिक पाऊल उचललं आहे.

या सामूहिक विवाह सोहळ्यात पाच तृतीयपंथीय जोडप्यांनी आपला जीवनसाथी स्वीकारला आणि विवाहाच्या गाठी बांधल्या. तृतीयपंथीय वधू-वरांसाठी हा विवाह सोहळा एक विशेष पर्व ठरला, कारण त्यांना देखील समाजात इतरांसारखा विवाह करण्याचा संधी मिळाली. या सोहळ्यात सर्व पारंपारिक आणि धार्मिक विधी पूर्ण करण्यात आले, ज्यात हळदी समारंभ, साखरपुडा, वरात, वऱ्हाडी मंडळी, सप्तपदी, कन्यादान आणि संसार उपयोगी साहित्याची भेट अशा सर्व गोष्टींचा समावेश होता. हे सर्व उत्साहात, नाचत आणि गात पार पडले.

तृतीयपंथीयांना मुख्य प्रवाहात आणण्यासाठी आणि त्यांना विवाहयोग्य साथीदारासोबत सुखी संसार सुरू करण्याची संधी देण्यासाठी हा विवाह सोहळा आयोजित करण्यात आला. अनेक तृतीयपंथीय व्यक्ती समाजाच्या मुख्य प्रवाहात येण्याचा विचार करत असतात, आणि त्यांच्या जीवनात हा क्षण एक महत्त्वाचा टर्निंग पॉइंट ठरला आहे.

या विवाह सोहळ्यात भाग घेतलेल्या तृतीयपंथीय वधू-वरांनी त्यांच्या आयुष्यातील मोठं स्वप्न पूर्ण झाल्याचा आनंद व्यक्त केला. समाजाने त्यांना समान हक्क आणि सन्मानाने स्वीकारल्यामुळे, हा सोहळा त्यांच्यासाठी एक ऐतिहासिक आणि प्रेरणादायक घटना ठरली. ह्या घटनेने समतेच्या दृषटिकोनातून एक महत्त्वपूर्ण पाऊल उचललं आहे, ज्यामुळे तृतीयपंथीयांना समाजात समान स्थान मिळण्याची आशा निर्माण झाली आहे.