Pune News: 'हॅलो!! इथं बलात्कार झालाय..' पोलीस ठाण्यात वाजला फोन, घटनास्थळी घेतली धाव, समोर जे पाहिलं..

पुण्यातील स्वारगेट बस डेपोत झालेल्या बलात्कार प्रकरणानंतर राज्यात संतापाची लाट उसळली होती. यानंतर पुण्यातील वारजे माळवाडी पोलीस ठाण्याच्या हद्दीतील पोलिसांना एक कॉल आला होता. त्या कॉलमध्ये एका अज्ञात व्यक्तीनं 'इथं बलात्कार झाला' असल्याचं सांगितलं. पोलिसांनी तातडीनं संबंधित ठिकाणी धाव घेतली. मात्र, एका मद्यपीनं दारूच्या नशेत कॉल केला असल्याचं उघड झालं.

ही घटना रविवारी ९ मार्चला घडली. श्रीनिवास अकोले या व्यक्तीनं दारूच्या नशेत पोलीस हेल्पलाइन ११२ वर कॉल केला होता. कॉल करून श्रीनिवासनं पोलिसांना 'इथं बलात्कार झाला' असं सांगितलं. कॉलवर पोलिसांची दिशाभूल करणाच्या प्रयत्न केला.

कॉल आल्यानंतर वारजे माळवाडी पोलीस ठाण्याचे वरिष्ठ निरीक्षक विश्वजित काईगडे, निरीक्षक नीलेश बडाख यांच्या अन्य अधिकारी आणि अंमलदारांनी तातडीनं घटनास्थळी धाव घेतली. घटनास्थळी धाव घेतल्यानंतर त्यांनी तक्रारदाराला कॉल केला. श्रीनिवास अकोले यांनी आपणच फोन केला असल्याचं सांगितलं.

श्रीनिवासची विचारपूस केली. तो अडखळत बोलत होता. पोलिसांना ठोस माहिती तो देऊ शकला नाही. त्यानंतर पोलिसांनी स्थानिक नागरीकांकडे विचारपूस केली. मात्र, चौकशीत अशी कोणतीही घटना घडलेली नसल्याचं परिसरातील लोकांनी सांगितलं.

अकोले याची चौकशी केली असता, पोलिसांना तो दारूच्या नशेत आढळला. त्यानं खोटी माहिती दिली असल्याचं त्यानं सांगितलं. यानंतर पोलिसांनी नागरीकांसाठी उपलब्ध करून दिलेल्या सेवेचा गैरवापर केल्याप्रकरणी श्रीनिवासवर पोलीस ठाण्यात तक्रार दाखल केली.