कौटुंबिक वाद टोकाला गेला; नवऱ्यानं बायकोला संपवलं, नंतर ट्रेनसमोर उडी मारली, डोंबिवली हादरली

डोंबिवलीत गुन्हेगारी घटनांमध्ये वाढ होत असतानाच, कोळेगाव परिसरातून पती पत्नीच्या नात्याला काळीमा फासणारी घटना उघडकीस आली आहे. कौटुंबिक वादातून आधी पतीनं पत्नीची हत्या केली. नंतर पतीनं ट्रेनसमोर उडी मारून आत्महत्या केली. या घटनेची माहिती पोलिसांना मिळताच त्यांनी तपासाला सुरूवात केली. पतीनं तणावातून आत्महत्या केल्याचा संशय पोलिसांनी व्यक्त केला आहे.

ही धक्कादायक घटना डोंबिवलीतील कोळेगाव परिसरातून उघडकीस आली आहे. पोपट दिलीप दहिज (वय वर्ष ३९) असे मृत आरोपीचं नाव आहे. तर, ज्योती दहिजे असे मृत महिलेचं नाव आहे. २६ नोव्हेंबर रोजी नवरा - बायकोमध्ये किरकोळ वादातून भांडण झालं. वादाचं रूपांतर हाणामारीत झालं.

याच किरकोळ वादातून पतीनं पत्नी ज्योती दहिजे हिच्यावर धारदार शस्त्राने हल्ला केला. तसेच तिचा गळा दाबून हत्या केली. यानंतर आरोपीनं मृतदेह घरात ठेवला. तसेच तो पसार झाला. या घटनेची माहिती पोलिसांना मिळताच त्यांनी ज्योतीचा मृतदेह ताब्यात घेत रूग्णालयात पाठवले. तसेच तपासाला सुरूवात केली.

कौटुंबिक वादातून आरोपी पतीनं पत्नीची हत्या केल्याचं उघड झालं. पोलिसांनी आरोपीवर हत्येचा गुन्हा दाखल केला. तसेच फरार आरोपीचा शोध घेण्यास सुरूवात केली. याच दरम्यान, २ दिवसांनंतर पोलिसांना भांडूप रेल्वे स्थानक परिसरात एका व्यक्तीने ट्रेन समोर उडी मारून आत्महत्या केल्याची माहिती मिळाली.

त्यानंतर पोलिसांनी या व्यक्तीबाबत माहिती काढली. दरम्यान, हा मृतदेह आरोपी पोपट दहिजे याचा असल्याची माहिती मिळाली. हे प्रकरण हत्येचं असल्याचं उघड झालं. या प्रकरणी सध्या पोलिसांकडून अधिक तपास सुरू आहे.