ठाकरेंच्या युतीवरुन मनसेत मतभेद, फडणवीस-राज यांच्या भेटीनंतर संदीप देशपांडेंचा गटाविरोधात मोर्चा

भरत मोहोळकर, साम टिव्ही

मुंबई : ठाकरे बंधूंच्या युतीची चर्चा सुरु असतानाच फडणवीस-राज यांच्या भेटीनंतर संदीप देशपांडेंनी ठाकरे गटाविरोधात मोर्चा उघडलाय. ठाकरे बंधूंच्या युतीबाबत देशपांडेंनी राऊतांसह उद्धव ठाकरेंविरोधात प्रश्नांची सरबत्तीच केलीय. तर दुसरीकडे प्रकाश महाजनांनी ठाकरे बंधूंच्या युतीवर मोठं भाष्य केलंय. त्यामुळे मनसेतच ठाकरे बंधूंच्या युतीवरून मतभेद असल्याचं समोर आलंय.

विधानसभा निवडणुकीनंतर राज ठाकरेंनी मतभेद विसरुन एकत्र येण्याबाबत वक्तव्य केलं होतं. त्याला उद्धव ठाकरेंनीही सकारात्मक प्रतिसाद दिला. त्यानंतर दोन्ही पक्षांच्या नेत्यांच्या भेटीगाठीही वाढल्या एवढंच नाही तर दोन्ही पक्षाच्या कार्यकर्त्यांनीही एकत्र येत सत्ताधाऱ्यांविरोधात एल्गार पुकारलाय. तर उद्धव ठाकरेंनीही युतीबाबत सकारात्मक भूमिका घेतलीय. त्यामुळे मनसेतील युतीबाबतचे मतभेदामुळे युतीला ब्रेक लागणार की ठाकरे बंधू एकीची वज्रमूठ आवळून मतभेदांना मुठमाती देणार? यावरच युतीचं भविष्य ठरणार आहे.