Eknath Shinde : CM शिंदे थोडक्यात बचावले; हेलिकॉप्टरची करावी लागली इमर्जन्सी लँडिंग, नेमकं काय घडलं?

मुंबई : मुख्यमंत्री एकनाथ शिंदे थोडक्यात बचावले. आज शुक्रवारी मुख्यमंत्र्यांच्या हेलिकॉप्टरचं खराब हवामानामुळे इमर्जन्सी लँडिंग करावं लागलं. त्यांचं हेलिकॉप्टर दरे गावातून पुण्याला जात होते. त्यावेळी ही घटना घडली. इमर्जन्सी लँडिंगनंतर ते कारने पुण्याला गेले.

नेमकं काय घडलं?

मुख्यमंत्री एकनाथ शिंदे हे सातारा दौऱ्यावर होते. साताऱ्यावरून मुख्यमंत्र्यांना दिल्लीला रवाना व्हायचं होतं. त्यासाठी मुख्यमंत्री हेलिकॉप्टरने पुण्याला जाणार होते. यासाठी मुख्यमंत्री एकनाथ शिंदे हे त्यांचे मूळ गाव सातारा जिल्ह्यातील दरे गावातून हेलिकॉप्टरने पुण्याच्या दिशेने स्वीय सहाय्यक प्रभाकरजी काळे, मंगेश चिवटे आणि विशेष कार्य अधिकारी कवळे यांच्यासोबत निघाले होते. पुण्याला निघाल्यानंतर अचानक वातावरण ढगाळ झालं आणि मुसळधार पाऊस सुरु झाला.

कोयना बॅकवॉटरच्या अगदी पंधरा फुटावर हेलिकॉप्टर खाली आलं होतं. त्यामुळे मुख्यमंत्र्यांचं हेलिकॉप्टर आजूबाजू्च्या कोणत्याही शेतामध्ये लँड करावे का? याबाबत पायलटने विचारणा केली. मात्र, आजाबाजूची कोणतीही जमीन सोयीची नव्हती. त्यामुले मुख्यमंत्र्यांचं हेलिकॉप्टर पुन्हा एकदा माघारी दरे या गावाच्या दिशेने निघाले.

हेलिकॉप्टरने ज्या ठिकाणाहून टेकऑफ घेतला. त्याच ठिकाणी पुन्हा एकदा हेलिकॉप्टर लँड झाले. त्यानंतर मुख्यमंत्री शिंदे मोटारीने पुण्याच्या दिशेने रवाना झाले. या मोठ्या घटनेतून मुख्यमंत्री शिंदे थोडक्यात बचावले. मुख्यमंत्री शिंदे सर्व सहकाऱ्यांसोबत पुन्हा एकदा पुण्याच्या दिशेने निघाले.