Chhagan Bhujbal News: कुणबी नेमकं कोण? मनोज जरांगेंच्या आरक्षणाच्या मागणीवर छगन भुजबळांचा सवाल, VIDEO

मुंबई : मराठा आंदोलकांनी ओबीसीतून आरक्षणाची मागणी लावून धरल्याने राजकीय वातावरण तापलं आहे. मराठा आणि कुणबी एकच असल्याचा दावा करत मनोज जरांगे पाटील यांनी आरक्षणाची मागणी लावून धरली आहे. मनोज जरांगे पाटील यांच्या याच मागणीवर मंत्री छगन भुजबळ यांनी आक्षेप घेतला आहे. मराठा-कुणबी एकच हा सामाजिक मुर्खपणा आहे. सर्व समाजाचे लोक शेती करतात, मग सगळे कुणबी आहेत का, असा सवाल मंत्री छगन भुजबळ यांनी केला.

मुंबईत आज ओबीसी नेत्यांची बैठक झाली. मंत्री छगन भुजबळ यांच्या प्रमुख उपस्थितीत बैठक झाली. प्रकाश शेंडगे, लक्ष्मण हाके यांच्यासह अनेक नेत्यांनी बैठकीला उपस्थित होते. या बैठकीनंतर माध्यमांशी संवाद साधताना मनोज जरांगे यांच्यावर टीका केली.

मंत्री छगन भुजबळ म्हणाले, 'काही वर्षांपूर्वी मराठा समाजाचे मोर्चे निघाले. गुजरातमध्ये पाटीदार समाजाचे मोर्चे निघाले. राजस्थानमध्ये गुर्जर समाजाचे मोर्चे निघाले. हरियाणात जाट समाजाचे आरक्षणासाठी मोर्चे निघाले. त्यानंतर ईडब्लूएस हा पर्याय समोर आला. केंद्र सरकारचा हा कायदा आहे. यात स्पष्ट केले की, जे दलित, आदिवासी, ओबीसी समाजात मोडत नाहीत. जे आर्थिकदृष्ट्या मागास आहेत. शैक्षणिकदृष्ट्या मागास आहेत. पण जे सामाजिकदृष्ट्या मागास नाहीत. त्यांना ईडब्लूएस आरक्षण लागू होतं'.

'ईडब्लूएस आरक्षण लागू झाल्यानंतर १० टक्क्यांपैकी ८ टक्के फायदा हा मराठा समाजाच्या उमेदवारांनी घेतला. ईडब्लूएस आल्यानतंर पाटीदार, जाटांचं आंदोलन बंद झालं. तरीसुद्ध काही नेते ऐकायला तयार नाहीत. त्यानंतरही मराठा समाजासाठी एसईबीएसी आरक्षण दिलं. तरी ओबीसीतून आरक्षणाची मागणी का? असा सवाल भुजबळ यांनी केला.

मराठा मागास नाही, भुजबळांनी दिला कोर्टाचा दाखला

उच्च न्यायालयाने म्हटलं आहे की, 'मराठा आणि कुणबी असं म्हणणं हा सामाजिक मुर्खपणा आहे'. एका दुसऱ्या निकालात म्हटलं गेलं की, मराठा आणि कुणबी या वेगळ्या जाती आहेत'. प्रकरण सुप्रीम कोर्टात गेल्यानंतर मराठा मागास नसल्याचे म्हटलं.