Kalyan Crime News : अल्पवयीन मुलीच्या हत्येनंतर घटनास्थळी घडला थरार, तरुणावर गुन्हा दाखल

- अभिजित देशमुख

Kalyan News : एकतर्फी प्रेमातून एका १२ वर्षीय अल्पवयीन मुलीवर चाकूने हल्ला करत तिची हत्या केल्याची धक्कादायक घटना कल्याण पूर्व तिसगाव परिसरात काल रात्रीच्या सुमारास घडली होती. धक्कादायक म्हणजे हल्ल्यानंतर संशयिताने स्वत:ला संपविण्याचा प्रयत्न केला. या प्रकरणी मुलावर गुन्हा दाखल केल्याची माहिती पाेलिसांनी दिली.(Maharashtra News)

कल्याण पूर्व तिसगाव परिसरात राहणाररी बारा वर्षे अल्पवयीन मुलगी काल सायंकाळी सात वाजण्याच्या सुमारास आपल्या आईसोबत घरी जात होती. सायंकाळी साडेसात वाजण्याच्या सुमारास इमारतीच्या आवारात पोहोचली जिना चढत असताना एका तरुणाने या मुलीवर चाकूने हल्ला केला.

अत्यंत निर्दयपणे तरुणाने तिच्यावर सहा ते सात वेळा चाकूने हल्ला केला. या हल्ल्यात मुलगी गंभीर जखमी झाली. तिला उपचारासाठी रुग्णालयात दाखल करण्यात आलं. मात्र उपचारादरम्यान तिचा मृत्यू झाला.

दरम्यान हल्ला करून हल्लेखोर पळून जात असताना नागरिकांनी त्याला पकडलं व पोलिसांच्या स्वाधीन केले. पाेलिसांनी दिलेल्या माहितीनूसार संशयिताचे नाव आदित्य कांबळे असे आहे. हल्ला करून पळून जात असताना त्याने फिनायल प्राशन केलं. त्यामुळे त्याची प्रकृती खालावली.

त्याला उपचारासाठी रुग्णालयात दाखल करण्यात आले आहे. गेल्या काही दिवसांपासून आदित्य हा अल्पवयीन मुलीच्या मागावर होता. या मुलीने नकार दिल्याने एकतर्फी प्रेमातून आदित्यने तिच्यावर चाकूने हल्ला केला.

याप्रकरणी कोळसेवाडी पोलिसांनी आदित्य कांबळे विरोधात गुन्हा दाखल करत या प्रकरणी पुढील तपास सुरू केला आहे अशी माहिती महेंद्र देशमुख (कोळसेवाडी पोलीस ठाणे वरिष्ठ पोलीस निरीक्षक) यांनी साम टीव्हीशी बाेलताना दिली.

Edited By : Siddharth Latkar