धक्कादायक! पुण्यात तरुणीवर बलात्काराचा प्रयत्न, प्रतिकारानंतर दिले सिगारेटचे चटके

गोपाल मोटघरे

पिंपरी: पुण्यातील आयटी सिटी अशी ओळख असलेल्या हिंजवडीत धक्कादायक प्रकार घडला आहे. एका तरुणीवर घरात घुसून बलात्कार करण्याचा प्रयत्न झाल्याची घटना उघडकीस आली आहे. तरुणीनं प्रतिकार केल्यानंतर आरोपींनी तिला सिगारेटचे चटके दिले. (Pune Breaking News)

मिळालेल्या माहितीनुसार, पुण्यातील आयटी सिटी हिंजवडीत हा धक्कादायक प्रकार घडला आहे. एका तरुणीवर दोन आरोपींनी घरात घुसून बलात्कार करण्याचा प्रयत्न केला. पीडित तरुणीनं प्रतिकार केला. त्यावर आरोपींनी तिला सिगारेट आणि लोखंडी झाऱ्याने चटके दिले. या प्रकारानं भेदरलेल्या पीडित तरुणीनं हिंजवडी पोलीस ठाण्यात धाव घेतली. हिंजवडी पोलिसांनी दोन अनोळखी आरोपींविरोधात विनयभंगाचा गुन्हा दाखल केला आहे. या प्रकरणाचा अधिक तपास पोलीस करत आहेत.

'ती' घटना एकच, पण नेमकं काय घडलं?

पुण्यातील हिंजवडीमध्ये एका तरुणीवर घरात घुसून दोघांनी अतिप्रसंगाचा प्रयत्न केला. या तरुणीनं प्रतिकार केल्यानंतर दोघा आरोपींनी तिला सिगारेटचे चटके दिले. मात्र, याच तरुणीनं बंडगार्डन पोलीस ठाण्यात धाव घेऊन धावत्या रिक्षात चालकानं आणि त्याच्या साथीदारानं विनयभंग केल्याची तक्रार दाखल केली. मात्र, या दोन्ही घटना एकच असल्याचे तपासात उघड झाले. पीडित तरुणीनं भीतीपोटी प्रथम बंडगार्डन पोलिसांत अशी तक्रार केली होती. पण पोलिसांनी चौकशी केली असता, खरा प्रकार समोर आला. धावत्या रिक्षात अशी काही घटना घडलीच नाही, असं तिनं पोलिसांना सांगितलं. मात्र, त्यावर पुन्हा विचारलं असता, हिंजवडीत घडलेला प्रकार कथन केला. दरम्यान, हा प्रकार रिक्षात घडला नसून, हिंजवडीत घडला होता, अशी माहिती उघड झाली आहे.