Heramb Mandir: हेरंब मंदिरात ड्रेस कोड लागू! फाटक्या जीन्स, स्कर्ट घालणाऱ्यांना अंबरनाथच्या मंदिरात NO Entry

अजय दुधाणे, साम प्रतिनिधी

अंबरनाथच्या हेरंब मंदिराने मंदिरात येणाऱ्या भाविकांसाठी ड्रेस कोड लागू करण्यात आलाय. मंदिरात येताना सद्गुणी पोशाखात यावं, फाटक्या जीन्स, स्कर्ट आणि असाभ्य कपडे घालून मंदिरात येऊ नये, असं आवाहन मंदिर समितीने भाविकांना केलं आहे. याबाबतचा फलक मंदिराबाहेर दर्शनी भागात लावण्यात आलाय. काही दिवसांपूर्वीच मुंबईतील सिद्धिविनायक मंदिराने भाविकांसाठी ड्रेस कोड लागू केला होता. याच पार्श्वभूमीवर अंबरनाथच्या हेरंब मंदिराने सुद्धा रेस कोड लागू करण्याचा निर्णय घेतलाय.

आपण लग्न समारंभाला किंवा पार्टीला जाताना ड्रेस कोड फॉलो करतो, मग मंदिरात येताना सभ्य कपडे आपण का घालू शकत नाही? असा सवाल हेरंब सेवा समितीचे अध्यक्ष अभय सोमण यांनी केलाय. भाविकांना अनेकदा तोंडी सूचना देऊन झाल्या. मात्र तरीही सुधारणा होत नसल्याने अखेर मंदिराच्या बाहेर दर्शनी भागात ड्रेस कोड बाबतच्या सूचनांचा फलक लावण्याची वेळ आमच्यावर आल्याचं सोमण यांनी सांगितलं. दक्षिण भारतात प्रत्येक मंदिरात जाताना लुंगी घालावी लागते. आम्ही निदान काय घालावं याची सक्ती करत नाही, परंतु किमान सभ्य कपडे घालावेत, इतकीच आमची भाविकांकडून अपेक्षा असल्याचं अभय सोमण म्हणाले.