दत्तात्रेय भरणे यांनी केले धनगर समाजाच्या 'त्या' इशाऱ्याचे समर्थन

पंढरपूर : आरक्षणाच्या मागणीसाठी धनगर समाजाने पुन्हा एकदा आंदोलनाची हाक दिली आहे. एवढेच नाही तर आषाढीच्या शासकीय महापूजेला मुख्यमंत्री उध्दव ठाकरे यांना पंढरपुरात येऊ देणार नाही, असा धनगर समाजाने इशारा दिला आहे. धनगर समाजाच्या या कृतीचे आज राष्ट्रवादीचे मंत्री व सोलापूरचे पालक मंत्री दत्तात्रय भरणे यांनी समर्थन करत त्यांच्या या मागणीला पाठींबा दिला आहे. त्यामुळे शिवसेना आणि राष्ट्रवादीतील धुसफूस समोर आली आहे.

हे देखिल पहा -

मंत्री दत्तात्रय भरणे आज पंढरपुरात आले होते. कोरोना काळात कोरोना योद्धा म्हणून काम केलेल्या अधिकारी व कर्मचाऱ्यांचा सत्कार पालकमंत्री दत्तात्रय भरणे यांच्या हस्ते करण्यात आला. या कार्यक्रमा नंतर पालक मंत्री भरणे यांनी पत्रकारांशी साधला. यावेळी त्यांनी धनगर आणि मराठा समाजाला आरक्षण मिळाले पाहिजे अशी भूमिका घेत मुख्यमंत्री उध्दव ठाकरे यांना दिलेल्या इशाऱ्याचे त्यांनी समर्थन केले.

धनगर समाज अनेक वर्षापासून आरक्षणाच्या मागणीसाठी लढत आहे. आरक्षणाची मागणी करणे हे गैर नाही. त्यांच्या या मागणीला राष्ट्रवादीचा पाठिंबा असल्याचेही भरणे यांनी स्पष्ट केले. भरणे यांच्या सूचक वक्तव्यामुळे राष्ट्रवादी आणि शिवसेने मध्ये असलेली धुसफूस पुन्हा एकदा समोर आली आहे.

Edited By - Amit Golwalkar