Lightning Strike : वीज कडाडली अन् झाला घात; बैल चारण्यासाठी गेलेल्या तरूणाचा मृत्यू, दोघे जखमी

संजय राठोड 
यवतमाळ : दुपारच्या सुमारास शेतात बैल चारण्यासाठी तरुण गेले होते. याचवेळी अचानक आभाळ दाटून आले आणि विजांचा कडकडाट देखील सुरु झाला. अशात वीज कोसळून एका तरुणाचा जागीच मृत्यू झाला. तर दोन जण गंभीर जखमी झाल्याची घटना यवतमाळच्या वणी तालुक्यातील तेजापूर शेतशिवारात घडली आहे. 

यवतमाळ जिल्ह्यातील वणी तालुक्यातील तेजापूर येथील शेतशिवारात सदरची घटना घडली आहे. यात धम्मरत्न सुधाकर भगत (वय २३) असे वीज कोसळून ठार झालेल्या तरुणाचे नाव आहे. तर गजानन दिवाकर कोंडेकर (वय २४) व पूनम संजय मालेकर (वय २३) हे दोन्ही गंभीर जखमी झाले आहेत. तेजापूर येथील तिघ मित्र भगत यांच्या शेतात बैल चारण्यासाठी गेले होते. सायंकाळपर्यंत हे तरुण थांबत असतात. 

पावसातून बचावासाठी तिघे गेले मांडवाखाली 

दरम्यान अचानक आभाळ दाटून विजांच्या कडकडाटासह जोरदार पाऊस सुरू झाला. पावसातून बचाव करण्यासाठी तिघे जण शेतातील मांडवाखाली जाऊन बसले. याच वेळी जोरदार आवाज होऊन मांडव्यावर वीज कोसळली. त्यात धम्मरत्न भगत हा जागीच ठार झाला. तर विजेच्या धक्क्याने गजानन कोंडेकर व पूनम मालेकर हे दोघं तरुण जखमी झाले आहेत. घटनेची माहिती मिळताच गावकऱ्यांनी तिघांना वणी येथील ग्रामीण रुग्णालयात आणले. 

एकुलता एक मुलगा हिरावला 

डॉक्टरांनी धम्मरत्न भगत याला मृत घोषित केले. तर जखमी झालेले दोन्ही तरुणांना एका खाजगी दवाखान्यात उपचाराकरिता दाखल करण्यात आले आहे. मृत धम्मरत्न भगत हा आई- वडिलांचा एकुलता मुलगा होता. त्याचे वडील अर्धांगवायू या आजाराने ग्रस्त आहे. त्याच्या मागे आई वडील व चार विवाहित बहीणी आहे. कुटुंबातील एकुलता कमावता व्यक्ती गेल्याने भगत कुटुंबावर दुःखाचा डोंगर कोसळला आहे.