Vaishnavi Hagawane : फरार निलेश चव्हाणला पकडून ठेवलय, त्याच्याजवळ दोन पिस्तूल...; पोलीस ठाण्यात फोन खणखणला, पण..

Vaishnavi Hagawane Case Updates : वैष्णवी हगवणे प्रकरणात हगवणे कुटुंबातील पाच जण पोलीस कोठडीत आहेत. काल (२८ मे) वैष्णवीचा नवरा, सासू, सासरे, दीर आणि नणंद यांना न्यायालयासमोर हजर करण्यात आले. न्यायालयाने वैष्णवीच्या नवऱ्याला, सासूला, नणंदेला एका दिवसाची पोलीस कोठडी सुनावली. तर सासरे आणि दीराला ३१ मे पर्यंतची पोलीस कोठडी सुनावण्यात आली. वैष्णवी हगवणे प्रकरणातील सहावा आरोपी निलेश चव्हाण अद्याप फरार आहे.

फरार आरोपी निलेश चव्हाणला आम्ही पकडून ठेवल आहे, असा फोन नांदेड सिटी पोलिसांना आला होता. त्यानंतर लगेचच पोलिसांचा ताफा ज्या ठिकाणाहून फोन आला, तेथे पोहोचला. फोन करणाऱ्या व्यक्तीने 'आम्ही वैष्णवी हगवणे प्रकरणातील फरार आरोपी चव्हाणला पकडून ठेवले आहे. त्याच्याजवळ दोन पिस्तूल आहेत. आम्ही त्याला मारहाण करुन गाडीच्या डिक्कीत ठेवले आहे' असे पोलिसांना सांगितले होते.

फोन आलेल्या ठिकाणावर पोलीस पोहोचले, तेव्हा त्यांनी फोन करणाऱ्या व्यक्तीचा शोध घ्यायला सुरुवात केली. त्यानंतर फोन करणाऱ्याने पोलिसांना खोटी माहिती दिल्याचे उघड झाले. फरार आरोपीची माहिती पोलिसांना दिल्यावर पोलिसांकडून आपल्याला बक्षिसाची रक्कम मिळेल या हेतूने आरोपीने ११२ क्रमांकावर पोलिसांना फोन केला होता.

खोटी माहिती दिल्याबद्दल पोलिसांनी संतोष गायकवाड (वय ३३) याच्याविरुद्ध नांदेड सिटी पोलीस ठाण्यात गुन्हा दाखल केला आहे. निलेश चव्हाणची खोटी माहिती देऊन पैसे मिळवण्याचा आरोपीचा बेत होता. पानशेत रस्त्यावरील स्वागत हॉटेल येथे आरोपीला पोलिसांनी गाठले. त्याच्याकडे निलेश चव्हाणची चौकशी केली, तेव्हा खोटा फोन केल्याचे आढळून आले.