दसरा मेळाव्यात तेजस ठाकरेंची तोफ धडाडणार, 'त्या' बॅनरमुळे राजकीय चर्चांना उधाण

डोंबिवली : अवघ्या तीन दिवसांनंतर दसऱ्याचा सण होऊ घातला असतानाच राजकीय वर्तुळातून खळबळ माजवणारी बातमी समोर आली आहे. मुख्यमंत्री एकनाथ शिंदे (Eknath Shinde) यांना जीवे मारण्याची धमकी देण्यात आली आहे. गुप्तचर विभागाला या धमकीबाबत माहिती मिळल्याने पोलीस यंत्रणा सतर्क झाल्या आहेत. तर दुसरीकडे दसरा मेळाव्यासाठी जोरदार शक्तिप्रदर्शन करण्यासाठी मागील काही दिवसांपासून शिंदे गट आणि शिवसेना पक्षप्रमुख उद्धव ठाकरे यांनी जय्यत तयारी सुरु केली आहे. या पार्श्वभूमीवर शिंदे गट आणि ठाकरे गट यांच्यात बॅनरबाजीचं शीतयुद्ध सुरु झालं आहे. (Uddhav Thackeray banner for dasara melava latest news update)

मुंबईपासून विविध शहरांच्या गल्ल्यांमध्ये दोन्ही गटाचे बॅनर झळकत आहेत. अशातच डोंबिवलीतही ठाकरे यांच्या शिवसेनेच्या बॅनरने सर्वांच्या भुवया उंचावल्या आहेत. कारण, बुधवारी होणाऱ्या दसरा मेळाव्यात (Dasara Melava) उद्धव ठाकरे यांच्या बॅनरवर दसरा मेळावा, चलो शिवतीर्थ अशाप्रकारे शिवसैनिकांना आवाहन करण्यात आलं आहे. विशेष म्हणजे ठाकरे यांच्या बॅनरवर दिवंगत शिवसेना प्रमुख बाळासाहेब ठाकरे, दिवंगत आनंद दिघे, युवासेना प्रमुख आदित्य ठाकेर यांच्यासोबत तेजस ठाकरे यांचाही फोटो लावण्यात आला आहे. त्यामुळे दसरा मेळाव्यात तेजस ठाकरेंची तोफ धडाडणार का? हे पाहणं औत्सुक्याचं ठरणार आहे.

बुधवारी ठाकरे गट आणि शिंदे गट दसरा मेळावा घेणार आहेत. शिवसेनेत विभाजन झाल्यानंतर पहिल्यांदाच दोन दसरा मेळावे होत असल्याने राजकीय चर्चांना उधाण आलं आहे.या दसऱ्या मेळाव्यात ठाकरे गट आणि शिंदे गट शक्तिप्रदर्शन करणार आहेत. त्यामुळे डोंबिवलीत दोन्ही गटांनी मोठ्या प्रमाणात बॅनरबाजी केली असून ठाकरे गटाच्या बॅनरची चर्चा रंगू लागली आहे.

कारण बॅनरवर तेजस ठाकरे यांचा फोटो लावण्यात आला आहे.त्यामुळे दसऱ्याला शिवसेनेत तेजस ठाकरे यांचे लॉचिंग होणार का? हे पाहणं महत्वाचं ठरणार आहे. तर दुसरीकडे शिंदे गटाचे बॅनर डोंबिवलीत झळकले असून या बॅनरमध्ये राजमुद्रेच्या आकार (षटकोन)आणि त्यात धनुष्यबाण दाखविण्यात आले आहे.

Edited By - Naresh Shende